తనుగుల చెక్‌డ్యామ్ కూల్చివేత కలకలం
ఇసుక మాఫియా పనేనా..? రైతుల్లో ఆగ్రహావేశం
కాకతీయ, జమ్మికుంట : కరీంనగర్ జిల్లా జమ్మికుంట మండలం తనుగుల వాగుపై నిర్మించిన మానేరు చెక్‌డ్యామ్‌ను శుక్రవారం అర్ధరాత్రి గుర్తు తెలియని దుండగులు ధ్వంసం చేయడంతో గ్రామాలన్నీ ఒక్కసారిగా కలవరపడ్డాయి. చెక్‌డ్యామ్‌ను నిశితంగా కూల్చివేయడం వెనుక అక్రమ ఇసుక మాఫియా కుట్రే ఉందని స్థానికులు అనుమానం వ్యక్తం చేస్తున్నారు.
తనుగుల వాగులో కొంతకాలంగా సాగుతున్న అక్రమ ఇసుక తవ్వకాలకే ఈ చెక్‌డ్యామ్ అడ్డుకట్ట వేస్తోందని, ఈ అడ్డంకిని తొలగించుకునేందుకు రాత్రి వేళల్లో పథకం ప్రకారం దాడి జరిగిందని గ్రామాల్లో పెద్ద ఎత్తున చర్చ నడుస్తోంది. కోట్ల రూపాయల విలువ చేసే ఇసుక వ్యాపారానికి డ్యామ్ ఉండటం వల్ల ఇబ్బంది పడుతున్న ముఠాలు ఈ చర్యకు పాల్పడి ఉండొచ్చని రైతులు ఆవేదన వ్యక్తం చేస్తున్నారు.గతంలో విలాసాగర్ చెక్‌డ్యామ్‌ను కూడా ఇలాంటివారే ధ్వంసం చేశారని గుర్తుచేసుకుంటూ, చెక్‌డ్యామ్‌లను లక్ష్యంగా చేసుకుని దాడులు జరగడం వెనుక ఒకే మాఫియాకు చెందిన వ్యక్తులు ఉన్నారన్న అనుమానాలు పెరుగుతున్నాయి. ఇలా ఒకొకటిగా చెక్‌డ్యామ్‌లను కూల్చేస్తుంటే వాగుల్లో నీటి నిల్వలు పూర్తిగా నశించిపోతాయి. పంటల భవిష్యత్తే ప్రమాదంలో పడుతుంది. ఈ దాడుల వెనుక ఉన్న పెద్ద తలకాయలను వెలికితీసి చర్యలు తీసుకోవాలి అని గ్రామస్థులు డిమాండ్ చేస్తున్నారు.చెక్‌డ్యామ్ ధ్వంసంతో వావిలాల, మీర్జంపేట,గుంపుల,తనుగుల, శంబునిపల్లి,పాపక్కపల్లె,పోచంపల్లి,నాగారం, పలు గ్రామాల వ్యవసాయంపై తీవ్ర ప్రభావం పడింది. వేల ఎకరాల్లో సాగు నీటి సరఫరా నిలిచిపోయింది.ప్రజా డబ్బుతో ప్రభుత్వం నిర్మించిన ఈ ఆస్తిని ఇలా ధ్వంసం చేయడానికి మాఫియాకు ఇంత ధైర్యం ఎక్కడి నుంచి వచ్చింది.? రాజకీయ అండ, అధికారుల మౌనమే వీరికి బలం ఇస్తోంది కాదా.? అని ప్రజలు ప్రశ్నిస్తున్నారు.ఈ ఘటనపై నీటిపారుదల శాఖ, రెవెన్యూ శాఖలతో పాటు పోలీసులు కూడా వెంటనే విచారణలోకి దిగాలని గ్రామస్తులు కోరుతున్నారు. చెక్‌డ్యామ్‌ను కూల్చివేసిన దుండగులను, వారిని ఆశ్రయిస్తున్న ఇసుక మాఫియా ముఠాలను గుర్తించి కఠిన చర్యలు తీసుకోవాలని పట్టు పట్టుతున్నారు. చెక్‌డ్యామ్‌ను అత్యవసర ప్రాతిపదికన పునర్నిర్మించాలని కూడా వారు డిమాండ్ చేశారు.
