హంపికి మోదీ అభినందనలు
ఫిడే వరల్డ్ రాపిడ్ చెస్లో కాంస్య పతకం
న్యూఢిల్లీ/దోహా : ఖతార్ రాజధాని దోహాలో జరిగిన 2025 ఫిడే (FIDE) వరల్డ్ రాపిడ్ చెస్ చాంపియన్షిప్లో కాంస్య పతకం సాధించిన భారత గ్రాండ్మాస్టర్ కోనేరు హంపిని ప్రధానమంత్రి నరేంద్ర మోదీ అభినందించారు. మహిళల విభాగంలో అద్భుత ప్రదర్శన కనబరిచిన హంపి భారత చెస్కు మరోసారి అంతర్జాతీయ వేదికపై గౌరవం తెచ్చారని మోదీ కొనియాడారు. మహిళల విభాగంలో జరిగిన 11 రౌండ్ల పోటీల ముగింపులో హంపి 8.5 పాయింట్లతో ఉమ్మడి అగ్రస్థానంలో నిలిచారు. అయితే టైబ్రేక్ నిబంధనల కారణంగా ఆమెకు కాంస్య పతకం లభించింది. ఈ సందర్భంగా ప్రధాని మోదీ తన ‘ఎక్స్’ (ట్విట్టర్) ఖాతాలో స్పందిస్తూ, “ఆట పట్ల కోనేరు హంపికి ఉన్న అంకితభావం ప్రశంసనీయం. ఆమె నిలకడైన ప్రతిభ ఎంతో మందికి స్ఫూర్తిదాయకం” అని పేర్కొన్నారు. భవిష్యత్తులో ఆమె మరిన్ని విజయాలు సాధించాలని శుభాకాంక్షలు తెలిపారు.
తెలంగాణ చెస్కు డబుల్ గౌరవం
ఇదే టోర్నమెంట్లో ఓపెన్ విభాగంలో తెలంగాణకు చెందిన అర్జున్ ఇరిగేసి కూడా కాంస్య పతకం సాధించడం విశేషం. భారత చెస్కు ఒకేసారి రెండు విభాగాల్లో పతకాలు రావడం గర్వకారణమని ప్రధాని మోదీ ఇద్దరు క్రీడాకారులను అభినందించారు. కోనేరు హంపి గతంలో 2019, 2024 సంవత్సరాల్లో ఇదే వరల్డ్ రాపిడ్ చెస్ చాంపియన్షిప్ మహిళల విభాగంలో స్వర్ణ పతకాలు సాధించి చరిత్ర సృష్టించారు. తాజా కాంస్యంతోనూ ప్రపంచ చెస్లో తన స్థిరమైన ఆధిపత్యాన్ని మరోసారి చాటుకున్నారని క్రీడా విశ్లేషకులు అభిప్రాయపడుతున్నారు.
