టికెట్ ఏదైనా ..యాప్ ఒక్కటే!
మీ టికెట్ యాప్ ద్వారా సరళమైన సేవలు
కొద్ది రోజుల్లోనే ఈ యాప్ మంచి ప్రజాదరణ
ఒక్క టికెట్‌తో అనేక రకాల సౌకర్యాలు
త‌ప్ప‌నున్న క్యూలైన్ల బాధ..
త్వరలోనే మరిన్ని సేవలను ఈయాప్ పరిధిలోకి..
ఐటీ మంత్రి దుద్దిళ్ల శ్రీధ‌ర్‌బాబు
కాకతీయ, తెలంగాణ బ్యూరో: ఈ వీకెండ్ సరదాగా.. ఫ్యామిలీతో బయటకు వెళ్లాలనుకుంటున్నారా.. మెట్రో లో ప్రయాణం… టెంపుల్ విజిట్, ఏదైనా పార్క్..?? లేదంటే గోల్కొండ ఫోర్ట్, మ్యూజియం సందర్శన చేయాలనుకుంటున్నారా.. పిల్లలకు సెలవులొచ్చాయి కానీ.. ఎండాకాలం అని భయపడుతున్నారా.. తీరా అక్కడికి వెళ్లాక టికెట్ కౌంటర్, క్యూ లైన్ అని వెనక్కుతగ్గుతున్నారా..?? ఇప్పుడా అవసరం లేదు.. స్మార్ట్ ఫోన్ ఉంటే చాలు.. జస్ట్ ఒక్క క్లిక్‌తో వీకెండ్ ప్లాన్ అంతా సాఫీగా జరిగిపోతోంది. మీ స్మార్ట్ ఫోన్ ద్వారా సింపుల్ గా ప్లే స్టోర్ నుంచి మీ టికెట్ యాప్ (MEE TICKET APP) డౌన్లోడ్ చేసుకుని, మన ప్రయాణ టికెట్లతో సహా, విజిటింగ్ ప్లేస్ టికెట్లు కూడా ఇంటి దగ్గరి నుంచే బుక్ చేసుకోవచ్చు. రాష్ట్ర ప్రభుత్వం ఐటీ శాఖ పరిధిలో ఉన్న మీసేవ ద్వారా తెచ్చిన ఈ మీటికెట్ యాప్ ఇప్పుడు ఎన్నో సర్వీసులను మీ అరచేతిలో ఉన్న ఫోన్ ద్వారా పొందే సౌకర్యాన్ని కల్పిస్తోంది.
బస్, మెట్రో ప్రయాణ టికెట్లు మొదలు..
బస్, మెట్రో ప్రయాణ టికెట్లు మొదలు, టెంపుల్స్, పార్కులు, మ్యూజియం, ఫారెస్ట్ సఫారీ సందర్శన ఇలా చాలా రకాల సౌకర్యాలు, వాటి టికెట్లను అక్కడి క్యూ లైన్ తో సంబంధంలేకుండా నేరుగా మనమే బుక్ చేసుకోవచ్చు. ఒక వేళ మీరు మీ ఎలక్ట్రిక్ కారులో ప్రయాణిస్తే సమీపంలో ఉన్న ఛార్జింగ్ స్టేషన్ లోకేషన్ ను కూడా ఈ యాప్ ద్వారా తెలుసుకునే వెసలుబాటు కూడా ఉంది. ఇలా ఇండోర్, అవుట్ డోర్ యాక్టివిటీస్ తో పాటు వివిధ సేవలను ఒకే యాప్ ద్వారా అందించటమే మీ టికెట్ యాప్ లక్ష్యం.
ప్రవేశపెట్టిన కొద్ది రోజుల్లోనే ఈ యాప్ మంచి ప్రజాదరణ పొందుతోంది. ఇప్పటికే సుమారు రెండున్నర లక్షల మంది ఈ యాప్ ను డౌన్లోడ్ చేసుకున్నారు. ఆరు లక్షలకు పైగా సేవలను పౌరులు బుక్ చేసుకున్నారు. నాలుగు కోట్ల రూపాయలకుపైగా విలువైన లావాదేవీలు సురక్షితంగా జరిగాయి. వివిధ ప్రభుత్వ శాఖలు నిర్వహించే 219 లోకేషన్లలో ఈ మీ టికెట్ యాప్ ద్వారా అక్కడి సేవలకు సంబంధించిన ప్రవేశ టికెట్లను నేరుగా యాప్ లోనే ప్రజలు పొందుతున్నారు. త్వరలోనే రాష్ట్ర వ్యాప్తంగా మరిన్ని సేవలను ఈయాప్ పరిధిలోకి తీసుకువస్తామని, ఐటీ సేవలను పౌరసమాజం నిత్య జీవితంలో మరింతగా వాడుకునేలా విస్తరిస్తామని సమాచార సాంకేతిక శాఖ మంత్రి దుద్దిళ్ల శ్రీధర్ బాబు తెలిపారు. సందర్శించే ప్రాంతం ఏదైనా, అక్కడిదాకా వెళ్లి క్యూలైన్ లో నిరీక్షించే బదులు మీటికెట్ యాప్ ను డౌన్లోడ్ చేసుకుని సులభంగా, సౌకర్యవంతంగా అక్కడి ఎంట్రీ టికెట్లను, సౌకర్యాలను బుక్ చేసుకోవచ్చని మీసేవ కమిషనర్ టీ. రవి కిరణ్ వెల్లడించారు.
