తూకాల్లో మోసం చేస్తే చర్యలు తప్పవు
లీగల్ మెట్రాలజీ అధికారి మనోహర్ హెచ్చరిక
నర్సంపేటలో 15 మంది వ్యాపారులపై కేసులు
కాకతీయ, వరంగల్ ప్రతినిధి : తూకాల్లో మోసాలకు పాల్పడితే కఠిన చర్యలు తప్పవని వరంగల్ జిల్లా లీగల్ మెట్రాలజీ అధికారి కె. మనోహర్ హెచ్చరించారు.
ఆదివారం నర్సంపేట పట్టణంలోని చేపలు, చికెన్, మాంసం, పండ్ల దుకాణాల్లో ఆయన ఆకస్మిక తనిఖీలు నిర్వహించారు. తూనికలు, కొలతల పరికరాలకు సకాలంలో ధ్రువీకరణ చేయించుకోకుండా, శాఖ ముద్రలు లేకుండా వ్యాపారం చేస్తున్న 15 మంది వ్యాపారులపై కేసులు నమోదు చేసినట్లు తెలిపారు.
వ్యాపారులందరూ తమ తూకపు యంత్రాలను నిర్ణీత గడువులోగా తనిఖీ చేయించి అధికారిక ముద్రలు వేయించుకోవాలని సూచించారు. వినియోగదారులకు సరైన తూకంతోనే సరుకులు అందించాలని, నిబంధనలు ఉల్లంఘిస్తే తూనికలు, కొలతల చట్టం ప్రకారం చర్యలు తీసుకుంటామని స్పష్టం చేశారు. వినియోగదారులు కూడా వస్తువులు కొనుగోలు చేసేటప్పుడు తూకాన్ని పరిశీలించాలని కోరారు.
