శివానంద ఆసుపత్రిలో అగ్నిమాపక భద్రతా ప్రమాణాలు ఏవీ?
క్షేత్రస్థాయి తనిఖీ చేపట్టాలి.. ఫైర్‌ ఎన్‌ఓసీ నిలిపివేయాలి
కార్పొరేటర్‌ బోట్ల శ్యామల–తంగేళ్ల కిరణ్కుమార్ ఫిర్యాదు
కాకతీయ, కరీంనగర్: కరీంనగర్ నగర పరిధిలోని శివానంద అండ్‌ మెటర్నిటీ ఆసుపత్రిలో అగ్నిమాపక భద్రతా ప్రమాణాలు పాటించడం లేదని నగరపాలక సంస్థ 27వ డివిజన్‌ కార్పొరేటర్‌ బోట్ల శ్యామల–తంగేళ్ల కిరణ్కుమార్ (టిల్లు) ఆరోపించారు. తెలంగాణ అగ్నిమాపక చట్టం–1999, జాతీయ భవన నిర్మాణ నియమావళి–2016 ప్రకారం ఆసుపత్రిలో కనీస భద్రతా ఏర్పాట్లు ఉన్నాయో లేదో అధికారులు పరిశీలించాలని కోరారు. ఈ మేరకు ఫైర్‌ ఆఫీసర్‌ శ్రీనివాస్‌రెడ్డికి ఫిర్యాదు లేఖ అందజేశారు. ఆసుపత్రి భవనాన్ని తక్షణమే క్షేత్రస్థాయిలో తనిఖీ చేసి, నిబంధనలు పాటించే వరకు అగ్నిమాపక అనుమతి పత్రాన్ని నిలిపివేయాలని లేదా రద్దు చేయాలని విజ్ఞప్తి చేశారు. దీనిపై స్పందించిన ఫైర్‌ ఆఫీసర్‌ వెంటనే విచారణ చేపట్టి ఆసుపత్రి యాజమాన్యానికి నోటీసులు జారీ చేస్తామని హామీ ఇచ్చినట్లు కార్పొరేటర్‌ తెలిపారు.
