ఓట్ల చోరీని అడ్డుకుంటాం!
ఓటర్ల జాబితాలో అక్రమాలపై కాంగ్రెస్‌ సమరం
ప్రతి బూత్‌లో తొలగించిన ఓట్లపై క్షేత్రస్థాయి పరిశీలన
‘ఓట్‌ బచావో–దేశ్‌ బచావో’ మూడో దశ కార్యాచరణ ఖరారు
రాహుల్‌ గాంధీ నాయకత్వంలో పోరాటం
ఏఐసీసీ పరిశీలకుడు కేబీఆర్‌ నాయుడు, డీసీసీ అధ్యక్షుడు ఇనగాల
కాకతీయ, హన్మ‌కొండ : కేంద్ర ప్రభుత్వ స్వార్థ ప్రయోజనాల కోసం ఓటర్ల జాబితాలో అక్రమాలకు పాల్పడుతున్నారని, ఎన్నికల సంఘాన్ని తమ ఆధీనంలోకి తెచ్చుకునేందుకు ప్రయత్నిస్తున్నారని ఏఐసీసీ పరిశీలకుడు కేబీఆర్‌ నాయుడు, హనుమకొండ జిల్లా డీసీసీ అధ్యక్షుడు ఇనగాల వెంకట్రామ్‌రెడ్డి విమర్శించారు. ఓటర్ల హక్కుల పరిరక్షణ కోసం కాంగ్రెస్‌ పార్టీ చేపట్టిన ‘ఓట్‌ బచావో–దేశ్‌ బచావో’ ఉద్యమాన్ని గ్రామస్థాయి వరకు తీసుకెళ్తామని స్పష్టం చేశారు. అక్టోబర్‌ 26న హనుమకొండ జిల్లా డీసీసీ భవన్‌లో ఇనగాల వెంకట్రామ్‌రెడ్డి అధ్యక్షతన నిర్వహించిన ఉద్యమ మూడో దశ కార్యాచరణ సమావేశంలో వారు మాట్లాడారు. మొదటి, రెండో దశలను పూర్తి చేసుకున్న ఉద్యమాన్ని ఇప్పుడు ప్రతి బ్లాక్‌, బూత్‌, గ్రామస్థాయికి విస్తరించేలా ప్రణాళిక రూపొందించినట్లు తెలిపారు. ఏఐసీసీ అధ్యక్షుడు మల్లికార్జున ఖర్గే, లోక్‌సభ ప్రతిపక్ష నేత రాహుల్‌ గాంధీ నాయకత్వంలో పోరాటం కొనసాగుతుందని పేర్కొన్నారు.
ప్రతి బూత్‌లో ఓట్ల పరిశీలన
జిల్లాలోని అన్ని నియోజకవర్గాల్లో బ్లాక్‌ కాంగ్రెస్‌ అధ్యక్షులు, బూత్‌ స్థాయి ఏజెంట్లతో సమావేశాలు నిర్వహిస్తామని నేతలు తెలిపారు. ఏఐసీసీ డిజిటల్‌ వేదిక ‘ఓట్‌ రక్షక్‌’ వినియోగంపై బూత్‌ ఏజెంట్లు, స్వచ్ఛంద కార్యకర్తలకు శిక్షణ ఇస్తామన్నారు. క్షేత్రస్థాయిలో ఓటర్ల జాబితాలను పరిశీలించి, అక్రమంగా తొలగించిన లేదా మార్చిన ఓట్ల వివరాలను సేకరిస్తామని చెప్పారు. సంతకాలతో కూడిన నివేదికలను సిద్ధం చేసి సంబంధిత అంశాలను వెలుగులోకి తీసుకొస్తామన్నారు. ప్రతి గ్రామంలో ఓటర్లు, గ్రామ పెద్దలు, యువకులు, పంచాయతీ ప్రతినిధులతో సంప్రదాయ మంచాల సమావేశాల తరహాలో ‘గ్రామ చౌపాల్‌’ కార్యక్రమాలు నిర్వహిస్తామని తెలిపారు. ఓటు హక్కు ప్రాముఖ్యత, ఓటర్ల జాబితాలో అక్రమాలపై ప్రజలకు అవగాహన కల్పిస్తామని, కార్యక్రమాల ఫొటోలు, వీడియోలను సామాజిక మాధ్యమాల్లో ప్రచారం చేస్తామని వివరించారు. ఎన్నికల ప్రక్రియలో మార్పులు తీసుకురావాలని, ప్రధాన ఎన్నికల కమిషనర్‌ జ్ఞానేశ్‌ కుమార్‌ను తొలగించాలని కాంగ్రెస్‌ నేతలు డిమాండ్‌ చేశారు. దేశ ప్రజల భవిష్యత్తు కోసం రాహుల్‌ గాంధీ నిరంతరం పోరాడుతున్నారని, రాబోయే రోజుల్లో ఆయనే ప్రధానమంత్రి అవుతారని కేబీఆర్‌ నాయుడు ధీమా వ్యక్తం చేశారు. నవంబర్‌ 1న న్యూఢిల్లీలోని రామ్‌లీలా మైదానంలో జరిగే జాతీయ ర్యాలీతో పాటు నవంబర్‌ 25, 26 తేదీల్లో నిర్వహించనున్న ‘దిల్లీ చలో’ కార్యక్రమానికి జిల్లా నుంచి మద్దతు తెలుపుతామని చెప్పారు. ఈ సమావేశంలో టీపీసీసీ సమన్వయకర్త అరికెల నర్సారెడ్డి, ఎమ్మెల్సీ బస్వరాజు సారయ్య, ఎమ్మెల్యేలు కె.ఆర్‌.నాగరాజు, రేవూరి ప్రకాష్‌రెడ్డి, టీపీసీసీ మహిళా కాంగ్రెస్‌ అధ్యక్షురాలు ఎర్రబెల్లి స్వర్ణ, కుడా చైర్మన్‌ గుండు సుధారాణి, మేర కోఆపరేటివ్‌ చైర్మన్‌ సంగ వెంకట్రాజం, టీపీసీసీ ప్రధాన కార్యదర్శి బొద్దిరెడ్డి ప్రభాకర్‌రెడ్డి, ఉపాధ్యక్షుడు దొమ్మటి సాంబయ్య, అధికార ప్రతినిధి కూచన రవళి, టీపీసీసీ సభ్యుడు భట్టి శ్రీనివాస్‌రావు, వరంగల్ డీసీసీ అధ్యక్షుడు ఎండీ అయ్యూబ్‌, వరంగల్ గ్రెయిన్‌ మార్కెట్‌ చైర్మన్‌ పులి ప్రియాంక, సాగరిక రావు, మాజీ కార్పొరేటర్లు, మండల, డివిజన్‌ అధ్యక్షులు, జిల్లా కమిటీ సభ్యులు, మహిళా కాంగ్రెస్‌, యువజన కాంగ్రెస్‌, ఎన్‌ఎస్‌యూఐ నాయకులు, కార్యకర్తలు పాల్గొన్నారు.
