పస్రాలో పర్యావరణ సెస్ మాయం
రూ.6.75 లక్షలు బ్యాంకులో జమ కాని వైనం
నివేదిక ఇచ్చినా నిద్రావస్థలో అటవీ శాఖ
ఆరు రోజుల వసూళ్లు మాయం
ప్రభుత్వ ఖజానాకు చేరని రూ.6.75 లక్షలు
బాధ్యుడైన అధికారిపై చర్యలు శూన్యం
కాకతీయ, నిఘా ములుగు: ములుగు జిల్లా పస్రా అటవీ చెక్‌పోస్టులో పర్యావరణ సెస్ వసూళ్ల వ్యవహారం తీవ్ర సంచలనం సృష్టిస్తోంది. ప్రజల నుంచి వసూలు చేసిన పర్యావరణ సెస్‌లో ఏకంగా రూ.6,75,350 బ్యాంకు ఖాతాలో జమ కాకపోవడం అటవీ శాఖ అధికారిక నివేదికలో వెలుగులోకి వచ్చింది. 2025 ఏప్రిల్ నెలలో చెక్‌పోస్టు ద్వారా మొత్తం రూ.28,90,400 వసూలు కాగా, అందులో రూ.20,94,050 మాత్రమే బ్యాంకులో జమ చేసినట్లు నివేదికలో పేర్కొన్నారు. మరో రూ.1,21,000 నగదు రూపంలో ఉన్నట్లు వివరించారు. మిగిలిన రూ.6,75,350 మాత్రం ఏప్రిల్ 21, 24, 25, 27, 29, 30 తేదీల్లో వసూలైనప్పటికీ బ్యాంకులో జమ కాలేదని తేదీల వారీగా లెక్కలతో సహా నివేదికలో పొందుపరిచారు. సంబంధిత మొత్తాన్ని మే 5లోగా బ్యాంకులో జమ చేయాలని ఆదేశించినట్లు కూడా నివేదికలో ప్రస్తావించారు. ఆరు రోజుల వసూళ్లకు సంబంధించిన లక్షల రూపాయలు బ్యాంకు ఖాతాలో జమ కాకపోవడం ప్రభుత్వ ఆదాయ నిర్వహణపై తీవ్ర ఆందోళనకు దారితీస్తోంది.
అధికారిక నివేదిక బహిర్గతం.. బాధ్యుడిపై చర్యలు మాత్రం శూన్యం
రూ.6.75 లక్షల నగదు బ్యాంకులో జమ కాలేదని అటవీ శాఖలోనే అధికారిక నివేదిక సమర్పించినప్పటికీ, ఇప్పటివరకు ఈ వ్యవహారంలో ఆరోపణలు ఎదుర్కొంటున్న సంబంధిత బీట్ అధికారి విధుల్లో కొనసాగుతుండటం మరింత వివాదానికి దారితీస్తోంది. ఇంతటి ఆర్థిక వ్యవహారం వెలుగులోకి వచ్చిన తర్వాత కూడా సంబంధిత అధికారిపై ఎలాంటి చర్యలు తీసుకున్నారనే వివరాలు స్పష్టంగా లేవు. నిధుల జమలో జరిగిన లోపాలపై పూర్తిస్థాయి విచారణ చేపట్టారా, సంబంధిత వ్యక్తి నుంచి వివరణ తీసుకున్నారా, వసూళ్ల రికార్డులు, బ్యాంకు లావాదేవీలను సరిపోల్చారా అనే అంశాలపై అటవీ శాఖ నుంచి స్పష్టత రావాల్సి ఉంది. అధికారిక నివేదిక ఉన్నప్పటికీ ఆరోపణలు ఎదుర్కొంటున్న అధికారి విధులు కొనసాగించడం, చర్యలపై సమాచారం లేకపోవడం ఉన్నతాధికారుల పర్యవేక్షణ తీరుపై విమర్శలకు కారణమవుతోంది.
చర్యలు తీసుకోవాల్సిన అధికారుల మౌనం.. అనుమానాలకు తావిస్తున్న తీరు
ప్రభుత్వ ఆదాయానికి సంబంధించిన రూ.6,75,350 నిధులు బ్యాంకులో జమ కాలేదని అధికారిక నివేదికలో వెల్లడైనప్పటికీ, చర్యలు తీసుకోవాల్సిన ఉన్నతాధికారులు నిమ్మకు నీరెత్తినట్లు వ్యవహరిస్తుండటంపై పలు అనుమానాలు వ్యక్తమవుతున్నాయి. ఇంతటి తీవ్రమైన ఆర్థిక వ్యవహారం వెలుగులోకి వచ్చినా బాధ్యులపై చర్యలు తీసుకోకపోవడం, ఆరోపణలు ఎదుర్కొంటున్న అధికారి ఇప్పటికీ విధుల్లో కొనసాగుతుండటం అనేక సందేహాలకు తావిస్తోంది. నివేదిక అందిన తర్వాత కూడా విచారణ, క్రమశిక్షణ చర్యల విషయంలో ఎందుకు జాప్యం జరుగుతోందన్నది చర్చనీయాంశంగా మారింది. ఈ వ్యవహారంలో ఉన్నతాధికారుల మౌనం వెనుక కారణాలపై స్పష్టత రావాల్సి ఉంది. ఇప్పటికైనా ఉన్నతాధికారులు స్పందించి సమగ్ర విచారణ చేపట్టి, నిధుల లెక్క తేల్చడంతో పాటు బాధ్యులపై నిబంధనల ప్రకారం కఠిన చర్యలు తీసుకోవాలని ప్రజలు కోరుతున్నారు.
