మహిళా సంక్షేమానికి అధిక ప్రాధాన్యం
నగర మేయర్ పునుకొల్లు నీరజ
మహిళా సంఘాలకు వడ్డీ లేని రుణాలు పంపిణీ
కాకతీయ, ఖమ్మం ప్రతినిధి : ప్రజా ప్రభుత్వం మహిళా సంక్షేమానికి అధిక ప్రాధాన్యత కల్పించిందని నగర మేయర్ పునుకొల్లు నీరజ అన్నారు. రఘునాథపాలెం రైతు వేదికలో మంగళవారం నిర్వహించిన వడ్డీ లేని రుణాల పంపిణీ కార్యక్రమంలో మేయర్ పునుకొల్లు నీరజ పాల్గొన్నారు. ఖమ్మం నియోజక వర్గం సంబంధించి 996 మహిళా సంఘాలకు 99 లక్షల 95 వేలు రుణాలు పంపిణీ చేశారు. ఈ సందర్భంగా మేయర్ నీరజ మాట్లాడుతూ సీఎం రేవంత్ రెడ్డి నాయకత్వంలో అనేక సంక్షేమ కార్యక్రమాలు అమలు చేస్తున్నామని అన్నారు.
సన్న బియ్యం, ఉచిత బస్సు, రూ.500లకే గ్యాస్ అందజేస్తుందన్నారు. వడ్డీ లేని రుణాలను మహిళలు తమ వ్యాపార అభివృద్ధికి వినియోగించుకోవాలని అన్నారు. రఘునాథ పాలెం మండలంలో సమీకృత రెసిడెన్షియల్ పాఠశాల, స్వామి నారాయణ విద్యాసంస్థలు, మెడికల్ కళాశాల సైతం ఏర్పాటవుతున్నాయని అన్నారు. జిల్లా రెవెన్యూ అధికారిణి పద్మశ్రీ మాట్లాడుతూ రుణాలను సద్వినియోగం అయ్యేలా చూడాలన్నారు. కార్యక్రమంలో ఖమ్మం మార్కెట్ కమిటీ చైర్మన్ వై. హన్మంత రావు, జిల్లా మైనారిటీ సంక్షేమ అధికారి ముజాహిద్, శిక్షణ డిప్యూటీ కలెక్టర్ అపూర్వ, కార్పొరేటర్లు లక్ష్మి, నీరజ, వైష్ణవి, తహసీల్దార్ శ్వేత, ఎంపీడీవో అశోక్ కుమార్, ఏపీఎం జ్యోతి, మండల సమాఖ్య బాధ్యులు శ్రీలక్ష్మి, ఉపేంద్రమ్మ పాల్గొన్నారు.
