ఓట్లతో ప‌ల్లాను పల్లపల్ల కొట్టాలి
ఫోన్ ట్యాపింగ్‌లో పల్లా పేరు
భువ‌న‌గిరి ఎంపీ చామల కిర‌ణ్‌కుమార్ రెడ్డి
చేర్యాల మున్సిపల్ అభ్యర్థుల జాబితా విడుదల
కాకతీయ, చేర్యాల : చేర్యాల మున్సిపాలిటీ ఎన్నికల్లో కాంగ్రెస్ పార్టీ అభ్యర్థుల జాబితా విడుదలైంది. మొత్తం 12 వార్డులకు 12 మంది అభ్యర్థుల పేర్లను భువ‌న‌గిరి ఎంపీ చామల కిరణ్ కుమార్ రెడ్డి , జనగామ నియోజకవర్గ ఇన్‌చార్జి కొమ్మూరి ప్రతాప్ రెడ్డి ప్రకటించారు. ఈ సందర్భంగా చేర్యాల‌లో ఏర్పాటు చేసిన సమావేశంలో ఎంపీ చామల కిరణ్ కుమార్ రెడ్డి తీవ్ర స్థాయిలో రాజకీయ వ్యాఖ్యలు చేస్తూ బీఆర్ఎస్ నేతలపై విరుచుకుపడ్డారు. సమావేశంలో ఎంపీ చామల మాట్లాడుతూ… సామదండోపాయాలు, కోవర్టు రాజకీయాలతో దొంగదారిలో గెలవాలని చూసే వారితో కాంగ్రెస్ శ్రేణులు అప్రమత్తంగా ఉండాలని హెచ్చరించారు. కాంగ్రెస్ పార్టీ తల్లిలాంటి పార్టీ అని, పార్టీలోనే ఉంటూ పార్టీని మోసం చేసే వారు బయటకు వెళ్లిపోవాలన్నారు. ఫోన్ ట్యాపింగ్ వ్యవహారంలో ఇజ్రాయెల్ నుంచి మిషన్ తెప్పించి ప్రముఖుల ఫోన్లు ట్యాప్ చేశారని ఆరోపించారు. ఆ జాబితాలో ప్రస్తుత జనగామ ఎమ్మెల్యే పల్లా రాజేశ్వర్ రెడ్డి పేరు ఉందని, “ఆలు–మొగుళ్ల ఫోన్లు ట్యాప్ చేశారని కేసీఆర్ బిడ్డ *కవిత*ే చెప్పింద”ని వ్యాఖ్యానించారు. పదేళ్ల పాలనలో నీళ్లు, నిధులు, నియామకాల పేరుతో వేల కోట్ల రూపాయలు దోచుకున్నారని బీఆర్ఎస్ నేతలపై మండిపడ్డారు. ఉద్యమకారులను అరెస్ట్ చేసినప్పుడు ఆత్మగౌరవం గుర్తు రాలేదా అని ప్రశ్నించారు. డిసెంబర్ 4న ఓటమి భయం పట్టడంతో ఇంటెలిజెన్స్ కార్యాలయంలో ఫోన్ ట్యాపింగ్ డేటాను తగలబెట్టారన్న ఆరోపణలు చేశారు.
‘ఓట్లతో పల్లపల్ల కొట్టండి’
చేర్యాల మున్సిపాలిటీలో కాంగ్రెస్ జెండా ఎగరవేయాలని కార్యకర్తలకు పిలుపునిచ్చిన ఎంపీ చామల, మరోసారి దొంగ రాజకీయాలు చేస్తే ఎమ్మెల్యే పల్లా రాజేశ్వర్ రెడ్డిని “ఓట్లతో పల్లపల్ల కొట్టాలి” అంటూ నినాదం ఇచ్చారు. నిజాయితీగా గెలిచే ధైర్యం ఉంటే నేరుగా బరిలో నిలవాలని సవాల్ విసిరారు. సీఎం రేవంత్ రెడ్డి నాయకత్వంలో ఫ్యూచర్ సిటీ నిర్మాణంతో అభివృద్ధి దిశగా రాష్ట్రం సాగుతుందని ధీమా వ్యక్తం చేశారు.
చేర్యాల మునిసిప‌ల్ వార్డులకు ఎంపిక చేసిన కాంగ్రెస్ అభ్యర్థుల జాబితా
1వ వార్డు – ఒగ్గు వెంకటమ్మ
2వ వార్డు – ముస్త్యాల తేజ
3వ వార్డు – కొమ్ము రాజేశ్వరి
4వ వార్డు – వంగ విజయలక్ష్మి
5వ వార్డు – వెలుగల దుర్గయ్య
6వ వార్డు – ముస్త్యాల కృష్ణ
7వ వార్డు – పోతుగంటి ప్రసాద్
8వ వార్డు – సందుల సురేష్
9వ వార్డు – మామిడాల నాగరాజు
10వ వార్డు – తుమ్మలపల్లి లీలా
11వ వార్డు – గుస్క వసంత
12వ వార్డు – మహమ్మద్ షరీఫా
