ఎస్సీ సెల్ పరిశీలకుడిగా కొరివి అరుణ్ కుమార్ నియామకం
ఎస్సీ సెల్ పునర్వ్యవస్థీకరణకు వేగం.. పాత కమిటీల రద్దు
కాకతీయ, కరీంనగర్ : ఉమ్మడి కరీంనగర్ జిల్లాలో కాంగ్రెస్ ఎస్సీ సెల్ పునర్వ్యవస్థీకరణ ప్రక్రియ వేగం పుంజుకుంది. ఈ క్రమంలో జిల్లా ఎస్సీ సెల్ పరిశీలకునిగా కొరివి అరుణ్ కుమార్ (పరిశీలకుడు, ఉమ్మడి కరీంనగర్ జిల్లా ఎస్సీ సెల్)ను నియమిస్తూ టీపీసీసీ ఎస్సీ సెల్ చైర్మన్ డా. కవ్వంపల్లి సత్యనారాయణ ఉత్తర్వులు జారీ చేశారు.
ఏఐసీసీ అధ్యక్షుడు మల్లికార్జున ఖర్గే, నేతలు రాహుల్ గాంధీ, సోనియా గాంధీ, ఎస్సీ విభాగం జాతీయ చైర్మన్ రాజేంద్ర పాల్ గౌతమ్, ముఖ్యమంత్రి రేవంత్ రెడ్డి, టీపీసీసీ అధ్యక్షుడు మహేష్ కుమార్ గౌడ్ సూచనల మేరకు రాష్ట్రవ్యాప్తంగా ఎస్సీ విభాగ కమిటీల పునర్వ్యవస్థీకరణ చేపడుతున్నట్లు పేర్కొన్నారు.
ఇప్పటికే పాత కమిటీలను రద్దు చేసిన టీపీసీసీ ఎస్సీ సెల్, కొత్త జిల్లా కమిటీల ఏర్పాటుకు చర్యలు ప్రారంభించింది. ఇందులో భాగంగా నియమితులైన పరిశీలకుడు కొరివి అరుణ్ కుమార్ (పరిశీలకుడు) జిల్లాలో పర్యటిస్తూ డీసీసీ అధ్యక్షుల అనుమతితో స్థానిక కాంగ్రెస్ నాయకులతో సమావేశాలు నిర్వహించనున్నారు.రాష్ట్ర, జిల్లా ఎస్సీ విభాగాల్లో పదవులు ఆశించే నాయకుల నుంచి దరఖాస్తులు స్వీకరించనున్నారు. అభ్యర్థులు తమ బయోడేటాతో పాటు వివరాలను కొరివి అరుణ్ కుమార్ (పరిశీలకుడు, ఉమ్మడి కరీంనగర్ జిల్లా ఎస్సీ సెల్)కు సమర్పించాలని సూచించారు. అనంతరం ఎంపికకు సంబంధించిన నివేదికను టీపీసీసీ ఎస్సీ సెల్ చైర్మన్కు అందజేస్తారు.
తనపై నమ్మకం ఉంచి బాధ్యతలు అప్పగించినందుకు టీపీసీసీ ఎస్సీ సెల్ చైర్మన్ డా. కవ్వంపల్లి సత్యనారాయణకు కొరివి అరుణ్ కుమార్ (పరిశీలకుడు) కృతజ్ఞతలు తెలిపారు. పార్టీ బలోపేతానికి కృషి చేస్తానని పేర్కొన్నారు.
