సిరిసిల్లలో చిట్టీల ‘చీకటి’ దందా

సిరిసిల్లలో చిట్టీల ‘చీకటి’ దందా
నేతన్నల జీవితాలతో చదరంగం
మ‌ళ్లీ ప‌డ‌గ విప్పుతున్న మైక్రో ఫైనాన్స్
జిల్లాలో యథేచ్ఛగా అక్రమ వ్యాపారం
వస్త్రరంగంలో ఆర్థిక సంక్షోభాన్ని ఆసరాగా చేసుకుని దళారుల కొత్త ఎత్తుగడలు
అడ్డగోలు వడ్డీలు వసూలు చేస్తున్న మైక్రో వ్యాపారులు
రికవరీ ఏజెంట్ల వేధింపులు తట్టుకోలేక కార్మికుల ఆత్మహత్యలు

కాకతీయ, సిరిసిల్ల టౌన్ : సిరిసిల్ల వస్త్రనగరంలో అక్రమ చిట్‌ఫండ్స్, ప్రైవేట్ ఫైనాన్స్ సంస్థల దందా మళ్లీ పడగ విప్పింది. చేనేత రంగంలో నెలకొన్న సుదీర్ఘ ఆర్థిక సంక్షోభం, పెరిగిన నిరుద్యోగ సమస్యను ఆసరాగా చేసుకుని బడా వ్యాపారులు, దళారులు నేతన్నలను, చిరు వ్యాపారులను నిలువునా ముంచుతున్నారు. గతంలో టాస్క్ ఫోర్స్ పోలీసులు, రిజిస్ట్రేషన్ శాఖ అధికారులు అక్రమ చిట్‌ఫండ్ నిర్వాహకులపై దాడులు చేసి కోట్లాది రూపాయల ఆస్తులు, ప్రామిసరీ నోట్లు, ఖాళీ చెక్కులు మరియు భూముల పత్రాలను స్వాధీనం చేసుకున్నప్పటికీ క్షేత్రస్థాయిలో పరిస్థితుల్లో ఎలాంటి మార్పు రాలేదు. ఇటీవల తలెత్తిన ఆర్థిక ఇబ్బందులను పెట్టుబడిగా మార్చుకుని ఈ అక్రమ వడ్డీ వ్యాపారులు, అనధికార చిట్ ఫండ్స్ ముఠాలు మళ్లీ తెరపైకి వచ్చి జోరుగా దందా సాగిస్తున్నాయి.

వస్త్ర సంక్షోభం ఆసరాగా అడ్డగోలు వడ్డీలు

ఇటీవలి కాలంలో సిరిసిల్ల నేత కార్మికులకు ఆశించిన స్థాయిలో ఉపాధి లభించక, చేతిలో పైసలు ఆడక తీవ్ర ఇబ్బందులు పడుతున్నారు. ఈ దీనస్థితిని ఆసరాగా చేసుకున్న ప్రైవేట్ ఫైనాన్స్ కంపెనీలు, మైక్రో ఫైనాన్స్ సంస్థలు చిరు వ్యాపారులను, నేత కార్మికులను లక్ష్యంగా చేసుకుంటున్నాయి. అత్యవసర అవసరాల కోసం వచ్చే కార్మికులకు ఎలాంటి పత్రాలు లేకుండానే అడ్డగోలు వడ్డీ రేట్లకు అప్పులు ఇస్తున్నాయి. ఆ తర్వాత సకాలంలో వాయిదాలు చెల్లించలేకపోతే చక్రవడ్డీలు, మీటర్ వడ్డీలు వేస్తూ అసలు కంటే వడ్డీనే రెట్టింపు చేస్తున్నాయి. కొన్ని మండల కేంద్రాలలో ప్రభుత్వ బ్యాంకింగ్ సౌకర్యాలు తగినంతగా అందుబాటులో లేకపోవడంతో, అత్యవసర సమయాల్లో దిక్కుతోచని స్థితిలో పేద ప్రజలు తప్పనిసరి పరిస్థితుల్లో ఈ మైక్రో ఫైనాన్స్ మాయాజాలంలో చిక్కుకుని సర్వస్వం కోల్పోతున్నారు. చట్టవిరుద్ధమైన నిబంధనలతో సాగుతున్న ఈ దందాపై అధికారులు తనిఖీలు పూర్తిగా విస్మరించడం వల్లనే వీరు రెచ్చిపోతున్నారనే విమర్శలు ఉన్నాయి.

రికవరీ ఏజెంట్ల వేధింపులు.. కార్మికుల ఆత్మఘోష

రుణాలు తీసుకున్న నేతన్నలు వడ్డీలు లేదా చిట్టీ వాయిదాలు కట్టడం కాస్త ఆలస్యమైతే చాలు.. ప్రైవేట్ సంస్థలు రంగంలోకి దించుతున్న ఋణ వసూలు ఏజెంట్ల (రికవరీ ఏజెంట్లు) అరాచకాలు పరాకాష్టకు చేరుతున్నాయి. ఇళ్లపైకి వచ్చి మహిళల ముందే అసభ్య పదజాలంతో దూషించడం, చట్టవిరుద్ధమైన ఎత్తుగడలతో మానసికంగా వేధించడం, బలవంతపు వసూళ్లకు పాల్పడటం ఇక్కడ నిత్యకృత్యంగా మారింది. వస్త్రరంగంలో పెరిగిన నిరుద్యోగం వల్ల తప్పని పరిస్థితుల్లో తీసుకున్న ఈ అప్పులు తీరక, రోజురోజుకూ పెరుగుతున్న వడ్డీల భారం మోయలేక, ఏజెంట్ల వేధింపులకు తట్టుకోలేక పలువురు చేనేత కార్మికులు బలవన్మరణాలకు పాల్పడుతున్నారు. ఇలా కార్మికులు ఆత్మహత్యలు చేసుకుంటుండటంతో వారి కుటుంబాలు పూర్తిగా చిన్నాభిన్నమై రోడ్డున పడుతున్న దుస్థితి సిరిసిల్లలో స్పష్టంగా కనిపిస్తోంది.
ఈ తీవ్రమైన పరిస్థితులపై బాధిత కుటుంబాలు, కార్మిక సంఘాలు తీవ్ర ఆగ్రహం వ్యక్తం చేస్తున్నాయి. ఇప్పటికైనా సంబంధిత అధికారులు నిద్రమత్తు వీడి జిల్లావ్యాప్తంగా అక్రమ చిట్‌ఫండ్ నిర్వాహకులపై, చట్టవిరుద్ధంగా నడుపుతున్న ఫైనాన్స్ సంస్థలపై ప్రత్యేక నిఘా పెట్టి దాడులు నిర్వహించాలని డిమాండ్ చేస్తున్నారు. వేధింపులకు పాల్పడుతున్న ఏజెంట్లపై క్రిమినల్ కేసులు నమోదు చేయడంతో పాటు, నిరుద్యోగంతో ఇబ్బంది పడుతున్న పేద కార్మికులకు ప్రభుత్వ గుర్తింపు పొందిన బ్యాంకుల ద్వారా తక్కువ వడ్డీకే ప్రత్యామ్నాయ రుణ సదుపాయాలు అందేలా చూడాలని జిల్లా యంత్రాంగాన్ని గట్టిగా కోరుతున్నారు.