వాహ్‌.. కమిషనర్‌ జీ! చిన్నారి వైద్యానికి అండగా అభిషేక్‌ అగస్త్య

వాహ్‌.. కమిషనర్‌ జీ!
చిన్నారి వైద్యానికి అండగా అభిషేక్‌ అగస్త్య
రూ.14 లక్షల సాయం అందేలా చొరవ
శస్త్రచికిత్స విజయవంతం.. కోలుకున్న చిన్నారి
‘జస్విక శ్రీ’గా నామకరణం.. కృతజ్ఞతలు తెలిపిన తల్లిదండ్రులు

కాకతీయ, ఖమ్మం బ్యూరో : ఆపదలో ఉన్న ఓ చిన్నారి కుటుంబానికి అండగా నిలిచారు ఖమ్మం మున్సిపల్‌ కమిషనర్‌ అభిషేక్‌ అగస్త్య. గుండె సంబంధిత సమస్యతో బాధపడుతున్న పసికందుకు చికిత్స చేయించేందుకు ఆర్థిక ఇబ్బందులతో సతమతమవుతున్న కుటుంబానికి ప్రభుత్వంతోపాటు స్వచ్ఛంద సంస్థల సహకారం అందేలా చొరవ తీసుకున్నారు. ఆయన కృషితో చిన్నారి గుండె శస్త్రచికిత్సకు అవసరమైన రూ.14 లక్షల ఆర్థిక సాయం మంజూరైంది. చికిత్స విజయవంతం కావడంతో ప్రస్తుతం చిన్నారి ఆరోగ్యంగా కోలుకుంది. ఖమ్మం నగరానికి చెందిన కాంపాటి రాకేష్‌, మాధవి దంపతులకు 2026 మే 9న ఆడబిడ్డ జన్మించింది. పుట్టిన 12 రోజులకే చిన్నారి గుండె సంబంధిత సమస్యతో బాధపడుతున్నట్లు కుటుంబ సభ్యులకు తెలిసింది. వైద్యులు శస్త్రచికిత్స అవసరమని సూచించడంతో.. అందుకు అయ్యే ఖర్చు భారీగా ఉండటంతో తల్లిదండ్రులు ఆందోళనకు గురయ్యారు. ఖమ్మం నగరపాలక సంస్థ పారిశుద్ధ్య విభాగంలో పనిచేస్తున్న చిన్నారి నానమ్మ నరసమ్మ ఈ విషయాన్ని కమిషనర్‌ అభిషేక్‌ అగస్త్య దృష్టికి తీసుకెళ్లారు. విషయం తెలుసుకున్న ఆయన వెంటనే స్పందించి చిన్నారి వైద్యానికి అవసరమైన సహాయం అందించే ప్రయత్నాలు ప్రారంభించారు.

రూ.14 లక్షల సాయం.. విజయవంతంగా ఆపరేషన్‌
హృదయ స్వచ్ఛంద సంస్థతోపాటు ప్రభుత్వ సహకారంతో చిన్నారి గుండె శస్త్రచికిత్సకు అవసరమైన రూ.14 లక్షల ఆర్థిక సాయం మంజూరయ్యేలా కమిషనర్‌ చొరవ తీసుకున్నారు. దీంతో జూలై 28న చిన్నారికి గుండె శస్త్రచికిత్స విజయవంతంగా నిర్వహించారు. ప్రస్తుతం చిన్నారి ఆరోగ్యంగా కోలుకోవడంతో కుటుంబ సభ్యుల్లో ఆనందం నెలకొంది. చికిత్స అనంతరం చిన్నారిని తీసుకుని తల్లిదండ్రులు మున్సిపల్‌ కమిషనర్‌ కార్యాలయానికి వచ్చారు. గ్రీవెన్స్‌ కార్యక్రమంలో కమిషనర్‌ను కలిసి తమ కుటుంబానికి చేసిన సాయానికి కృతజ్ఞతలు తెలిపారు.

‘జస్విక శ్రీ’గా నామకరణం

తమ కుమార్తెకు కమిషనర్‌ పేరే పెట్టాలని కుటుంబ సభ్యులు కోరారు. దీంతో అభిషేక్‌ అగస్త్య సంతోషం వ్యక్తం చేస్తూ చిన్నారికి ‘జస్విక శ్రీ’ అని నామకరణం చేశారు. చిన్నారి సంపూర్ణ ఆరోగ్యంతో, సంతోషంగా ఎదగాలని ఆకాంక్షించారు. ఆపదలో ఉన్న తమ కుటుంబానికి సకాలంలో స్పందించి చిన్నారి ప్రాణాలు నిలిచేలా వైద్య సాయం అందేందుకు కృషి చేసిన కమిషనర్‌ అభిషేక్‌ అగస్త్యకు రాకేష్‌, మాధవి దంపతులు కృతజ్ఞతలు తెలిపారు.