పార్టీ సిద్ధాంతాలను ప్రజల్లోకి తీసుకెళ్లాలి
క్షేత్రస్థాయిలో పార్టీ బలోపేతమే లక్ష్యం కావాలి
ప్రతి కార్యకర్త ఆదర్శ నాయకుడిగా ఎదగాలి
: మాజీ గవర్నర్ సీహెచ్ విద్యాసాగర్ రావు
కరీంనగర్లో బీజేపీ రెండు రోజుల శిక్షణ శిబిరం ముగింపు
12 విడతలుగా (సెషన్లు) 346 మంది ప్రతినిధులకు దిశానిర్దేశం
కాకతీయ, కరీంనగర్ : పార్టీ సిద్ధాంతాలను ప్రజల్లోకి బలంగా తీసుకెళ్లడంతో పాటు క్షేత్రస్థాయిలో సంస్థాగత బలోపేతంపై ప్రత్యేక దృష్టి సారించాలని బీజేపీ నాయకులు కార్యకర్తలకు పిలుపునిచ్చారు. కరీంనగర్ జిల్లా బీజేపీ ఆధ్వర్యంలో తిమ్మాపూర్ మండలం మహాత్మానగర్ (ఎల్ఎండీ)లోని శ్రీ చైతన్య ఇంజినీరింగ్ కళాశాలలో నిర్వహించిన రెండ్రోజుల శిక్షణ శిబిరం ఆదివారం సాయంత్రం ముగిసింది. ‘పండిత్ దీన్ దయాళ్ ఉపాధ్యాయ ప్రశిక్షణ మహా అభియాన్’ పేరుతో నిర్వహించిన ఈ శిబిరంలో రాష్ట్ర, జిల్లా, నియోజకవర్గ స్థాయిలకు చెందిన 346 మంది పార్టీ ప్రతినిధులు పాల్గొన్నారు. శనివారం ప్రారంభమైన ఈ శిక్షణా కార్యక్రమాన్ని బీజేపీ రాష్ట్ర అధ్యక్షుడు ఎన్. రామచందర్ రావు ప్రారంభించి, పార్టీ సిద్ధాంతాలు, కేంద్ర ప్రభుత్వ పథకాలు, సంస్థాగత నిర్మాణం, భవిష్యత్ కార్యాచరణ వంటి అంశాలపై కార్యకర్తలకు మార్గనిర్దేశం చేశారు.
12 విడతలుగా విస్తృత శిక్షణ
రెండు రోజుల పాటు మొత్తం 12 విడతలుగా జరిగిన ఈ శిబిరంలో.. పార్టీ ఆవిర్భావం, భావజాలం, లక్ష్యాలు, ప్రజా సమస్యలపై పోరాట విధానం, అధికార పక్షాన్ని రాజకీయంగా ఎదుర్కొనే వ్యూహాలు, పార్టీ విస్తరణ, సామాజిక మాధ్యమాల (సోషల్ మీడియా) వినియోగం తదితర అంశాలపై రాష్ట్రస్థాయి నాయకులు విస్తృతంగా వివరించారు. ఒక్కో అంశంపై 45 నిమిషాల నుండి గంటకు పైగా కార్యకర్తలకు శిక్షణ అందించారు. ఈ శిబిరంలో అయ్యంగారి ప్రభాకర్ రెడ్డి, దేవకి వాసుదేవరావు, అల్జాపూర్ శ్రీనివాస్, బండారి శాంతికుమార్, రాణి రుద్రమ, గుజ్జుల ప్రేమేందర్ రెడ్డి, పోరెడ్డి కిషోర్, రంజిత్ మోహన్, మురళీధర్ రావు, కడగంచి రమేష్, ఆర్ఎస్ఎస్ విభాగ్ ప్రచారక్ భానుజీ తదితరులు వివిధ అంశాలపై ప్రసంగించారు.
సమాజంలో ఆదర్శంగా నిలవాలి
ముగింపు కార్యక్రమానికి ముఖ్య అతిథిగా హాజరైన మాజీ గవర్నర్ సీహెచ్ విద్యాసాగర్ రావు మాట్లాడుతూ.. పార్టీ సిద్ధాంతాన్ని సామాన్య ప్రజల్లోకి తీసుకెళ్లే బాధ్యత ప్రతి కార్యకర్తపై ఉందన్నారు. శిక్షణలో నేర్చుకున్న ముఖ్యాంశాలను క్షేత్రస్థాయిలో అమలు చేస్తూ పార్టీని మరింత విస్తరించాలని సూచించారు. మంచి నాయకత్వ లక్షణాలు పెంపొందించుకుని సమాజంలో ఆదర్శ కార్యకర్తలుగా నిలవాలని ఆకాంక్షించారు. ఈ శిక్షణ శిబిరంలో జిల్లా అధ్యక్షుడు గంగాడి కృష్ణారెడ్డి, మేయర్ కోలగాని శ్రీనివాస్, డిప్యూటీ మేయర్ సునీల్ రావు, మాజీ జిల్లా అధ్యక్షుడు బాస సత్యనారాయణరావు, జిల్లా ప్రధాన కార్యదర్శులు తాళ్లపల్లి శ్రీనివాస్ గౌడ్, మాడ వెంకట్రెడ్డి, బత్తుల లక్ష్మీనారాయణతో పాటు పలువురు నాయకులు, ప్రజాప్రతినిధులు, మండల అధ్యక్షులు, వివిధ విభాగాల (మోర్చాల) బాధ్యులు, కార్యకర్తలు పెద్ద సంఖ్యలో పాల్గొన్నారు.
