సోనో విజన్‌లో భారీ చోరీ
అర్ధరాత్రి వేళ తాళాలు పగలగొట్టి మొబైల్స్ అపహరణ
ఘటనా స్థలాన్ని పరిశీలించిన పోలీస్ కమిషనర్ సునీల్ దత్
రంగంలోకి క్లూస్ టీమ్.. వేలిముద్రల సేకరణ
సీసీటీవీ పుటేజీల ఆధారంగా నిందితుల కోసం గాలింపు
కాకతీయ, ఖమ్మం బ్యూరో : నగరంలోని ప్రముఖ విక్రయ కేంద్రం ‘సోనో విజన్’లో భారీ చోరీ జరిగింది. అర్ధరాత్రి వేళ షాపు తాళాలు పగలగొట్టి లోపలికి చొరబడిన గుర్తుతెలియని దుండగులు, స్టాక్ రూమ్‌లో భద్రపరిచిన విలువైన అధునాతన మొబైల్ ఫోన్లను అపహరించారు. చోరీ సమాచారం అందుకున్న పోలీస్ కమిషనర్ సునీల్ దత్ హుటాహుటిన ఘటనా స్థలానికి చేరుకున్నారు. దుండగులు ప్రవేశించిన మార్గం, చోరీ జరిగిన తీరును క్షుణ్ణంగా పరిశీలించారు. నిందితులను త్వరగా పట్టుకోవాలని అధికారులను ఆదేశించారు. యాజమాన్యం ఇచ్చిన ఫిర్యాదుతో కేసు నమోదు చేసిన పోలీసులు, రంగంలోకి దిగారు. క్లూస్ టీమ్ క్షేత్రస్థాయిలో వేలిముద్రలు, ఇతర కీలక ఆధారాలను సేకరిస్తోంది. “నగరంలోని ప్రముఖ విక్రయ కేంద్రమైన సోనో విజన్‌లో జరిగిన చోరీ ఘటనను అత్యంత తీవ్రంగా పరిగణిస్తున్నాం. నిందితులను త్వరితగతిన పట్టుకుని, దొంగిలించిన సొత్తును రికవరీ చేసేందుకు ప్రత్యేక బృందాలను రంగంలోకి దించాం” అని పోలీస్ కమిషనర్ సునీల్ దత్ పేర్కొన్నారు.
ఆధారాల వేటలో క్లూస్ టీమ్
అర్ధరాత్రి వేళ షాపు తాళాలు పగలగొట్టి లోపలికి చొరబడిన గుర్తుతెలియని దుండగులు, స్టాక్ రూమ్‌లో భద్రపరిచిన విలువైన అధునాతన మొబైల్ ఫోన్లను అపహరించినట్లు యాజమాన్యం పోలీసులకు ఫిర్యాదు చేసింది. కేసు నమోదు చేసుకున్న స్థానిక పోలీసులు వెంటనే ఘటనా స్థలానికి చేరుకుని ప్రాథమిక దర్యాప్తు చేపట్టారు. రంగంలోకి దిగిన క్లూస్ టీమ్ నిందితులకు సంబంధించిన వేలిముద్రలు, ఇతర కీలక ఆధారాలను సేకరించే పనిలో నిమగ్నమయ్యారు. షాపు పరిసర ప్రాంతాల్లోని సీసీటీవీ కెమెరాల్లో నమోదైన దృశ్యాలను పోలీసులు క్షుణ్ణంగా పరిశీలిస్తున్నారు. దుండగులు వచ్చిన మార్గం, వారు పారిపోయిన దిశను గుర్తించేందుకు సాంకేతిక ఆధారాలను విశ్లేషిస్తున్నారు. నగరంలో ఇలాంటి చోరీలకు పాల్పడే పాత నేరస్తుల కదలికలపై నిఘా పెంచినట్లు పోలీసులు వెల్లడించారు. ఈ ఘటనపై కేసు నమోదు చేసుకుని, నిందితులను పట్టుకునేందుకు దర్యాప్తు ముమ్మరం చేశామని కమిషనర్ స్పష్టం చేశారు.
