మట్టి రవాణాపై ఉక్కుపాదం
చేర్యాల పోలీసుల మెరుపు దాడి
ఐదు టిప్పర్లు స్వాధీనం.. మైనింగ్ అధికారులకు అప్పగింత
అక్రమ రవాణాపై కఠిన చర్యలు ఉంటాయి : ఎస్సై అపూర్వ రెడ్డి
కాకతీయ, చేర్యాల: అనుమతులు లేకుండా అక్రమంగా మట్టిని తరలిస్తున్న ఐదు టిప్పర్లను చేర్యాల పోలీసులు సోమవారం స్వాధీనం చేసుకున్నారు. చేర్యాల ఎస్సై అపూర్వ రెడ్డి నేతృత్వంలో ఈ తనిఖీలు చేపట్టారు. యాదాద్రి భువనగిరి జిల్లా కొలనుపాకలోని ఓ రైతు పట్టా భూమి నుండి మట్టిని తరలిస్తున్నట్లు అందిన విశ్వసనీయ సమాచారం మేరకు, ఎస్సై అపూర్వ రెడ్డి తన సిబ్బందితో కలిసి చేర్యాల మండలంలోని ముస్త్యాల గ్రామ శివారులో తనిఖీలు నిర్వహించారు. ఈ తనిఖీల్లో మట్టిని రవాణా చేస్తున్న ఐదు టిప్పర్లను గుర్తించి, వాటిని వెంటనే స్వాధీనం చేసుకున్నారు. స్వాధీనం చేసుకున్న వాహనాలను పోలీస్ స్టేషన్కు తరలించి, తదుపరి విచారణ మరియు చట్టపరమైన చర్యల కోసం మైనింగ్ శాఖ అధికారులకు అప్పగించినట్లు ఎస్సై తెలిపారు. ఈ సందర్భంగా ఎస్సై మాట్లాడుతూ, అనుమతులు లేకుండా అక్రమ మైనింగ్ లేదా మట్టి రవాణాకు పాల్పడితే ఉపేక్షించేది లేదని హెచ్చరించారు. అక్రమ రవాణాకు పాల్పడే వారిపై కఠినమైన చట్టపరమైన చర్యలు తీసుకుంటామని స్పష్టం చేశారు. అక్రమ మట్టి తవ్వకాలు, రవాణా గురించి ఎవరైనా సమాచారం అందించాలని ఆమె ప్రజలను కోరారు. అక్రమ మైనింగ్ను అరికట్టేందుకు పోలీసు మరియు మైనింగ్ శాఖల సంయుక్త నిఘా కొనసాగుతుందని ఎస్సై అపూర్వ రెడ్డి పేర్కొన్నారు.
