30న సిరిసిల్లలో లక్ష మందితో సీఎం సభ
సీఎం సభను విజయవంతం చేయాలి
కాంగ్రెస్ అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లాలి
రాష్ట్ర ప్రభుత్వ విప్ ఆది శ్రీనివాస్ పిలుపు
కాకతీయ, రుద్రంగి : సెప్టెంబర్ 30న రాజన్న సిరిసిల్ల జిల్లా కేంద్రంలో ముఖ్యమంత్రి ఎ. రేవంత్రెడ్డి పాల్గొనే భారీ బహిరంగ సభను లక్ష మందితో నిర్వహించనున్నామని, ప్రజలు విజయవంతం చేయాలని రాష్ట్ర ప్రభుత్వ విప్, వేములవాడ ఎమ్మెల్యే ఆది శ్రీనివాస్ పిలుపునిచ్చారు. సభ నిర్వహణపై గురువారం రుద్రంగి మండల కేంద్రంలో నిర్వహించిన సన్నాహక సమావేశంలో ఆయన పార్టీ నాయకులు, కార్యకర్తలకు దిశానిర్దేశం చేశారు. కాంగ్రెస్ ప్రభుత్వం చేపట్టిన అభివృద్ధి, సంక్షేమ కార్యక్రమాలను ప్రజలకు వివరించడంతో పాటు భవిష్యత్ కార్యాచరణను ప్రజల్లోకి తీసుకెళ్లేందుకు సభ నిర్వహిస్తున్నట్లు తెలిపారు. చేనేత రంగానికి గత ప్రభుత్వం మిగిల్చిన బకాయిలు చెల్లించడంతో పాటు కార్మికులకు ఆర్డర్లు కల్పిస్తున్నామని చెప్పారు. వేములవాడ రాజన్న ఆలయ అభివృద్ధికి నిధులు వెచ్చిస్తున్నామని, కలికోట సూరమ్మ ప్రాజెక్టు భూసేకరణకు రూ.80 కోట్లు విడుదల చేసినట్లు తెలిపారు.
22ఏ భూముల విషయంలో అర్హులైన పేదలకు న్యాయం చేసే దిశగా చర్యలు చేపడుతున్నామని అన్నారు. గ్రామాల నుంచి ప్రజలను తరలించేందుకు అవసరమైన బస్సుల వివరాలను ముందుగానే ఇవ్వాలని సూచించారు. సభను విజయవంతం చేసేందుకు గ్రామ, మండల స్థాయిలో కార్యాచరణ చేపట్టాలని కోరారు.
