గోదావరి వరదను వృథా చేయొద్దు
అన్ని మోటార్లు నడిపి రిజర్వాయర్లు నింపాలి
కాళేశ్వరం జలాలను పూర్తిస్థాయిలో వినియోగించాలి
మల్లన్నసాగర్ సహా రిజర్వాయర్లకు నీటిని తరలించాలి
రైతులకు సాగునీరు.. హైదరాబాద్కు తాగునీరు అందించాలి
బీఆర్ఎస్ శాసనసభా పక్ష ఉపనేత, ఎమ్మెల్యే తన్నీరు హరీశ్రావు
కాకతీయ,తెలంగాణ బ్యూరో : గోదావరిలో భారీగా వరద ప్రవాహం కొనసాగుతున్న నేపథ్యంలో ఆ జలాలను పూర్తిస్థాయిలో సద్వినియోగం చేసుకునేలా తక్షణమే అన్ని మోటార్లు నడిపి రిజర్వాయర్లను నింపాలని బీఆర్ఎస్ శాసనసభా పక్ష ఉపనేత, సిద్దిపేట ఎమ్మెల్యే తన్నీరు హరీశ్రావు సీఎం రేవంత్రెడ్డిని కోరారు. గోదావరి వరద జలాలను ఒడిసిపట్టి కాళేశ్వరం ప్రాజెక్టు పరిధిలోని రిజర్వాయర్లను నింపితే రైతులకు భారీ ప్రయోజనం కలుగుతుందని పేర్కొన్నారు. ఈ మేరకు ముఖ్యమంత్రికి లేఖ రాశారు. గోదావరి జలాలను పూర్తిస్థాయిలో సద్వినియోగం చేసుకోవాలనే ఉద్దేశంతో గత ప్రభుత్వం కాళేశ్వరం ప్రాజెక్టు వ్యవస్థను నిర్మించిందని హరీశ్రావు లేఖలో పేర్కొన్నారు. ఇందులో భాగంగా 141 టీఎంసీల సామర్థ్యం కలిగిన రిజర్వాయర్లను ఏర్పాటు చేసినట్లు తెలిపారు. ప్రస్తుతం గోదావరిలో భారీ వరద ప్రవాహం కొనసాగుతున్నప్పటికీ.. ఆ నీటిని ఎత్తిపోసి రిజర్వాయర్లను నింపడంలో ప్రభుత్వం నిర్లక్ష్యం వహిస్తోందని విమర్శించారు. మరోవైపు పంటలకు నీరందక రైతులు ఇబ్బందులు పడుతున్నారని పేర్కొన్నారు.
రిజర్వాయర్లకు నీటిని తరలించాలి
మల్లన్నసాగర్, రంగనాయకసాగర్, కొండపోచమ్మసాగర్, గంధమల్ల, బస్వాపూర్ రిజర్వాయర్లకు నీటిని తరలించాలని హరీశ్రావు కోరారు. దీనివల్ల ఆయా ప్రాంతాల్లోని రైతులకు సాగునీరు అందించడంతోపాటు హైదరాబాద్ తాగునీటి అవసరాలను కూడా తీర్చే అవకాశం ఉంటుందని తెలిపారు. కొండపోచమ్మసాగర్లో 15 టీఎంసీలకు గాను 6 టీఎంసీల నీటి నిల్వ మాత్రమే ఉందని పేర్కొన్నారు. అక్కడికీ నీటిని ఎత్తిపోసి యాదాద్రి భువనగిరి జిల్లాలోని బస్వాపూర్, గంధమల్ల రిజర్వాయర్లకు ప్రయోజనం చేకూర్చాలని కోరారు. ఎల్లంపల్లి నుంచి నీటి ఎత్తిపోతలను ప్రారంభించి మిడ్మానేరు, సరస్వతి, మల్లన్నసాగర్, కొండపోచమ్మసాగర్, గంధమల్ల తదితర రిజర్వాయర్లను నింపాలని హరీశ్రావు సూచించారు. కాళేశ్వరం వ్యవస్థలోని మోటార్లను పూర్తిస్థాయిలో వినియోగిస్తే వరద జలాలను నిల్వ చేసుకునే అవకాశం ఉంటుందని తెలిపారు. ప్రస్తుత పరిస్థితుల్లో అందుబాటులో ఉన్న నీటిని వినియోగించకుండా వదిలేయడం వల్ల భవిష్యత్లో సాగునీటి కొరత ఏర్పడే ప్రమాదం ఉందని పేర్కొన్నారు.
రైతులకు ప్రయోజనం చేకూరాలి
వర్షాకాలంలో గోదావరిలో వచ్చే వరద నీటిని నిల్వ చేసుకుంటే రిజర్వాయర్ల కింద ఉన్న ఆయకట్టుకు సాగునీరు అందించవచ్చని హరీశ్రావు తెలిపారు. గతంలో ప్రభుత్వాలు ప్రాజెక్టులు, రిజర్వాయర్లను నిర్మించిన ఉద్దేశం రైతులకు నీరు అందించడమేనని పేర్కొన్నారు. ప్రస్తుతం గోదావరి వరద జలాలు అందుబాటులో ఉన్నందున వాటిని ఎత్తిపోసి రైతులకు ప్రయోజనం చేకూర్చాలని డిమాండ్ చేశారు. ఇప్పటికైనా ఆలస్యం చేయకుండా గోదావరి వరద జలాలను సద్వినియోగం చేసుకునేలా చర్యలు తీసుకోవాలని హరీశ్రావు కోరారు. అన్ని మోటార్లను నడిపి రిజర్వాయర్లను నింపాలని, రైతులకు సాగునీరు అందించేలా చర్యలు చేపట్టాలని విజ్ఞప్తి చేశారు. రాజకీయాలను పక్కనపెట్టి రైతు ప్రయోజనాల కోసం అందుబాటులో ఉన్న గోదావరి జలాలను వినియోగించాలని కోరారు. ప్రస్తుతం గోదావరి నదిలో వరద ప్రవాహం కొనసాగుతున్న నేపథ్యంలో ఈ అవకాశాన్ని ప్రభుత్వం పూర్తిస్థాయిలో వినియోగించుకోవాలని లేఖలో స్పష్టం చేశారు.
