ఇన్స్టాకార్ట్లో గడువు తీరిన ఆహార పదార్థాలు
కుళ్లిన కూరగాయలు.. లీకైన పాల ప్యాకెట్లు
చెడిపోయిన చీజ్, పాలు, నూనె, ఐస్క్రీమ్
రస్ట్ పట్టిన ర్యాకులు.. అపరిశుభ్ర వాతావరణం
అధికారుల తనిఖీలో విస్తుగొలిపే నిజాలు వెలుగులోకి
లైసెన్స్ సస్పెన్షన్కు సిఫారసు
కాకతీయ, హైదరాబాద్ : పాతేర్ఘట్టి పరిధిలోని ఇన్స్టాకార్ట్ సర్వీసెస్ ప్రైవేట్ లిమిటెడ్లో ఆహార భద్రతా నిబంధనల ఉల్లంఘనలు వెలుగుచూశాయి. గ్రౌండ్ ఫ్లోర్, పంజేశా రోడ్, చౌక్ మహ్మద్ఖాన్ ప్రాంతంలోని సంస్థను అధికారులు తనిఖీ చేయగా గడువు తీరిన, పాడైన, నిల్వ నిబంధనలకు విరుద్ధంగా ఉన్న పలు ఆహార పదార్థాలను గుర్తించారు. కంపౌండెడ్ ఇంగువ పొడి, కట్ ఫ్రూట్స్, ఐడీ ఇడ్లీ, దోస బ్యాటర్, హ్యాపిలో క్యాష్యూస్, నందిని నెయ్యి వంటి గడువు తీరిన పదార్థాలు గుర్తించారు. ప్యాకేజ్డ్ కూరగాయల విభాగంలో వంకాయ సహా కుళ్లిన, పాడైన కూరగాయలు ఉన్నట్లు తనిఖీలో తేలింది. మురికిగా, లీకేజీతో, దెబ్బతిన్న పాల ప్యాకెట్లు కూడా గుర్తించారు. ఫ్రీజర్ ఉష్ణోగ్రత సుమారు మైనస్ 16.4 డిగ్రీల సెల్సియస్గా నమోదైంది. ఫ్రీజర్లో లీకైన, పాడైన చీజ్, పాలు, నూనె, ఐస్క్రీమ్ ఉత్పత్తులు గుర్తించారు. వీటి వల్ల పరస్పర కలుషితానికి అవకాశం ఉందని అధికారులు పేర్కొన్నారు. రస్ట్ పట్టిన, దెబ్బతిన్న నిల్వ ర్యాకులు కనిపించగా, ఆహార పదార్థాలను ఇతర వస్తువులతో కలిపి నిల్వ చేసినట్లు గుర్తించారు.
శుభ్రతపై నిర్లక్ష్యం
ర్యాకులు, షెల్ఫ్లు, పరిసర ప్రాంతాల్లో ఆహార అవశేషాలు, దుమ్ము, మురికి పేరుకుపోయినట్లు గుర్తించారు. డీప్ క్లీనింగ్, శుభ్రతకు సంబంధించిన రికార్డులు నిర్వహించలేదని తేలింది. అలాగే ఫస్ట్ ఇన్ ఫస్ట్ అవుట్, ఫస్ట్ ఎక్స్పైరీ ఫస్ట్ అవుట్ విధానాలను సక్రమంగా పాటించలేదని అధికారులు గుర్తించారు. గడువు తీరిన, పాడైన, దెబ్బతిన్న, వినియోగానికి అనర్హమైన ఆహార పదార్థాలను అక్కడికక్కడే వేరు చేసి తొలగించారు. సంస్థకు మెరుగుదల నోటీసు జారీ చేయడంతోపాటు లైసెన్స్ సస్పెన్షన్కు సిఫారసు చేశారు.
