రైల్వే ఉద్యోగాల పేరుతో రూ.6 లక్షల మోసం
రౌడీ షీటర్ పై కేసు నమోదు
ఏనుమాముల సీఐ సురేష్ వెల్లడి
కాకతీయ, వరంగల్ ప్రతినిధి : రైల్వే ఉద్యోగాలు ఇప్పిస్తానని నమ్మబలికి రూ.6 లక్షలు వసూలు చేసి మోసం చేసిన రౌడీ షీటర్ పై ఏనుమాముల పోలీసులు కేసు నమోదు చేశారు.
ఏనుమాముల ఇన్స్పెక్టర్ జవ్వాజి సురేష్ తెలిపిన వివరాల ప్రకారం, హన్మకొండ సుధానగర్ కు చెందిన ముద్దుల చంద్రకళ వద్దకు ఆరు సంవత్సరాల క్రితం పైడిపల్లి గ్రామానికి చెందిన రౌడీ షీటర్ వడ్డమానుకోట తిరుపతి (తండ్రి కొమరయ్య) వచ్చి, ఆమె కొడుకు క్రాంతికి రైల్వే ఉద్యోగం ఇప్పిస్తానని చెప్పి రూ.3 లక్షలు తీసుకున్నాడు. అదేవిధంగా ఆమె అల్లుడు ఎల్లావుల పద్మ కొడుకు క్రాంతికి కూడా ఉద్యోగం ఇప్పిస్తానని మరో రూ.3 లక్షలు వసూలు చేశాడు.
ఏళ్లు గడిచినా ఉద్యోగం రాకపోవడంతో పాటు డబ్బులు తిరిగి ఇవ్వకపోవడంతో బాధితులు శనివారం ఉదయం పైడిపల్లిలోని నిందితుడి ఇంటికి వెళ్లి నిలదీశారు. దీంతో ఆగ్రహించిన తిరుపతి బాధితులను అసభ్యంగా దూషిస్తూ చెప్పుతో కొట్టేందుకు యత్నించి, చంపేస్తానంటూ బెదిరించాడు.
బాధితురాలి ఫిర్యాదు మేరకు నిందితుడిపై మోసం, ప్రాణ బెదిరింపుల కింద కేసు నమోదు చేసి దర్యాప్తు చేస్తున్నట్లు ఇన్స్పెక్టర్ తెలిపారు. నిరుద్యోగులను ఉద్యోగాల పేరుతో మోసం చేసే వారిపై కఠిన చర్యలు తీసుకుంటామని హెచ్చరించారు.
