శిశు మందిర్‌లపై రాష్ట్ర ప్రభుత్వ చిన్నచూపు!
కేంద్ర హోంశాఖ సహాయ మంత్రి బండి సంజయ్‌కుమార్‌ విమర్శ
కాకతీయ, కరీంనగర్: కార్పొరేట్‌ విద్యాసంస్థలకు ధీటుగా నాణ్యమైన విద్యను అందిస్తూ ఎంతోమంది పేద విద్యార్థుల అభ్యున్నతికి తోడ్పడుతున్న సరస్వతీ శిశు మందిర్‌ పాఠశాలల పట్ల రాష్ట్ర ప్రభుత్వం నిర్లక్ష్య ధోరణి అవలంబిస్తోందని కేంద్ర హోంశాఖ సహాయ మంత్రి బండి సంజయ్‌కుమార్‌ విమర్శించారు. విద్యాసేవలందిస్తున్న సంస్థల పట్ల రాజకీయ ధోరణితో వ్యవహరించడం సరికాదన్నారు. కరీంనగర్‌లోని శ్రీ సరస్వతీ శిశు మందిర్‌ ఇంగ్లిష్‌ మీడియం హైస్కూల్‌లో నిర్వహించిన విభాగ్‌ స్థాయి సమావేశాలకు ఆయన హాజరై విద్యావేత్తలతో మాట్లాడారు. శిశు మందిర్‌ విద్యావిధానం విద్యార్థుల్లో చదువుతోపాటు సంస్కారం, క్రమశిక్షణ, దేశభక్తి, నైతిక విలువలను పెంపొందిస్తోందని బండి సంజయ్‌కుమార్‌ పేర్కొన్నారు. ఈ పాఠశాలల్లో చదివిన ఎంతోమంది విద్యార్థులు నేడు ఉన్నత స్థానాల్లో ఉన్నారని గుర్తుచేశారు. సమాజానికి నైతిక విలువలను అందిస్తూ అంకితభావంతో పనిచేస్తున్న విద్యాసంస్థల పట్ల పాలకులు చిన్నచూపు చూడటం సరికాదన్నారు. సమావేశంలో దక్షిణ మధ్య క్షేత్ర సంఘటన మంత్రి లింగం సుధాకర్‌రెడ్డి విద్యా సంబంధిత అంశాలు, విద్యార్థుల సమగ్ర వికాసం, ఆచార్యుల బాధ్యతలు, పాఠశాలల అభివృద్ధిపై మార్గదర్శనం చేశారు. కార్యక్రమంలో ముక్కాల సీతారాములు, పాక సత్యనారాయణ, నల్లాన్‌ చక్రవర్తుల కృష్ణమాచార్యులు, ఇంజనీర్‌ కోల అన్నారెడ్డి, తేళ్ల రాజమౌళి, ప్రధానోపాధ్యాయులు మోర రణదీర్‌, ఎలగందుల సత్యనారాయణ, బండారి కరుణాకర్‌, సాంబ శివరావు, కాటం రవీందర్‌, వివిధ పాఠశాలల ప్రతినిధులు, ఆచార్యులు, కార్యకర్తలు పాల్గొన్నారు.
