- స్థానిక ఎన్నికల్లో రిజర్వేషన్లపై స్పష్టత ఇవ్వండి
- తెలంగాణ ప్రభుత్వానికి ఎస్ఈసీ లేఖ
- ఈనెల 15న కేబినెట్ భేటీలో చర్చించే అవకాశం !
కాకతీయ, తెలంగాణ బ్యూరో : తెలంగాణలో స్థానిక సంస్థల ఎన్నికల నిర్వహణపై సందిగ్ధత కొనసాగుతున్న నేపథ్యంలో రాష్ట్ర ఎన్నికల సంఘం (ఈసీ) కీలక అడుగు వేసింది. ఇటీవలి హైకోర్టు తీర్పు నేపథ్యంలో రిజర్వేషన్ల అంశంపై పూర్తి స్పష్టత ఇవ్వాలని కోరుతూ ఈసీ రాష్ట్ర ప్రభుత్వానికి లేఖ రాసింది. హైకోర్టు స్థానిక సంస్థల ఎన్నికల నిర్వహణపై ఎటువంటి అభ్యంతరం తెలపలేదని ఈసీ ఆ లేఖలో స్పష్టం చేసింది. రిజర్వేషన్లు 50 శాతం మించకుండా పాత పద్ధతిలో ఎన్నికలు నిర్వహించుకోవచ్చునని హైకోర్టు ఆదేశించిన విషయాన్ని.. అలాగే అదనంగా కేటాయించిన 17 శాతం రిజర్వేషన్లను ఓపెన్ కేటగిరీగా నోటిఫై చేసుకోవచ్చునని కోర్టు సూచించిన విషయాన్ని ఈసీ ప్రభుత్వానికి గుర్తు చేసింది.
ఉన్నతాధికారులతో సమావేశం
కోర్టు తీర్పు దృష్ట్యా తదుపరి చర్యలు, ఎన్నికల ప్రక్రియను ఎలా ముందుకు తీసుకెళ్లాలనే అంశంపై ప్రభుత్వం నుంచి రాష్ట్ర ఎన్నికల సంఘం తక్షణమే వివరణ కోరింది. ఈ అంశానికి సంబంధించి ఎన్నికల కమిషన్ కార్యాలయంలో నేడోరేపో ఉన్నతాధికారులతో రాష్ట్ర ఎన్నికల కమిషనర్ రాణి కుముదిని కీలక సమావేశం నిర్వహించనున్నారు. బీసీ రిజర్వేషన్లపై స్పష్టత లేకపోవడం వల్ల ఎన్నికల ప్రక్రియను వాయిదా వేయాలా లేదా ? తదుపరి చర్యలు ఏమిటో ఈ సమావేశంలో నిర్ణయిస్తారు. ఈ సమావేశంలో తీసుకునే నిర్ణయాల ఆధారంగానే తెలంగాణలో స్థానిక సంస్థల ఎన్నికల నిర్వహణ ఆధారపడి ఉంటుంది.
మంత్రివ‌ర్గంలో చర్చించి..
ఇక హైకోర్టు ఆదేశాలపై తెలంగాణ ప్రభుత్వం ఇప్పటివరకూ అధికారికంగా స్పందించలేదు. దీంతో ఈ తీర్పుపై రాష్ట్ర ప్రభుత్వం తదుపరి ఎలాంటి నిర్ణయం తీసుకుంటుందనే దానిపై సర్వత్రా ఉత్కంఠ నెలకొంది. ఈ అంశంపై ప్రభుత్వం సుప్రీంకోర్టును ఆశ్రయించే అవకాశం ఉందనే ఊహాగానాలు వినిపిస్తున్నాయి. కాగా.. ఈనెల 15న ముఖ్యమంత్రి రేవంత్ రెడ్డి అధ్యక్షతన తెలంగాణ కేబినెట్ సమావేశం జరగనుంది. ఈ సమావేశంలో బీసీ రిజర్వేషన్లతో పాటు, హైకోర్టు తాజా తీర్పుపై కూడా మంత్రివర్గం చర్చించి కీలక నిర్ణయం తీసుకునే అవకాశం ఉంది. హైకోర్టు జారీ చేసిన ఆర్డర్ కాపీపై ఎన్నికల సంఘం న్యాయనిపుణులతో సంప్రదింపులు జరుపుతోంది.
