గెలిచిన వెంటనే సర్టిఫికేట్ తప్పనిసరి
ఫామ్-27లో ధృవీకరణ పత్రం జారీ చేయాలి
అభ్యర్థి సంతకం తీసుకోవడం తప్పనిసరి
మున్సిపల్ ఫలితాలపై రాష్ట్ర ఎన్నికల సంఘం కీలక మార్గదర్శకాలు
కాకతీయ, తెలంగాణ బ్యూరో : మున్సిపల్ ఎన్నికల్లో గెలిచిన అభ్యర్థులకు వెంటనే ధృవీకరణ పత్రం (ఎల‌క్ష‌న్ స‌ర్టిఫికెట్‌) జారీ చేయాలని రాష్ట్ర ఎన్నికల సంఘం స్పష్టమైన ఆదేశాలు జారీ చేసింది. ఫలితాలు అధికారికంగా ప్రకటించిన వెంటనే, విజేతగా నిలిచిన అభ్యర్థికి అక్కడికక్కడే సర్టిఫికేట్ అందజేయాలని పేర్కొంది. ఈ ప్రక్రియలో ఎలాంటి ఆలస్యం చేయరాదని ఎన్నికల అధికారులకు సూచించింది. ఎన్నికల్లో విజయం సాధించిన అభ్యర్థిని అధికారికంగా గుర్తించడానికి ఫామ్-27లో ధృవీకరణ పత్రం జారీ చేయడం తప్పనిసరి అని ఎన్నికల సంఘం స్పష్టం చేసింది. సంబంధిత రిటర్నింగ్ ఆఫీసర్ ఈ ఫారాన్ని సిద్ధం చేసి, ఫలితాలు ప్రకటించిన వెంటనే విజేతకు అందజేయాలని ఆదేశించింది.
రిటర్నింగ్ ఆఫీసర్ సమక్షంలో సర్టిఫికేట్ అందజేత
ధృవీకరణ పత్రాన్ని రిటర్నింగ్ ఆఫీసర్ సమక్షంలోనే అభ్యర్థికి అందజేయాలని ఎన్నికల సంఘం స్పష్టం చేసింది. సర్టిఫికేట్ అందుకున్న అనంతరం, అభ్యర్థి దానిపై సంతకం చేయాల్సి ఉంటుంది. అదే సమయంలో, అభ్యర్థి అధికారికంగా ఎన్నికైన వ్యక్తిగా గుర్తింపు పొందినట్లు రిటర్నింగ్ ఆఫీసర్ ధృవీకరించాలి. ఈ ప్రక్రియ ఎన్నికల పారదర్శకతను నిర్ధారించడంలో కీలక పాత్ర పోషిస్తుందని అధికారులు తెలిపారు. ఎన్నికల ఫలితాల ప్రకటన అనంతరం అభ్యర్థి గెలుపును అధికారికంగా నమోదు చేయడం ఈ సర్టిఫికేట్ ద్వారా జరుగుతుంది.
పారదర్శకత కోసం ఎన్నికల సంఘం చర్యలు
మున్సిపల్ ఎన్నికల ఫలితాల ప్రక్రియ పారదర్శకంగా, సక్రమంగా కొనసాగేందుకు రాష్ట్ర ఎన్నికల సంఘం ఈ మార్గదర్శకాలు జారీ చేసింది. ఎన్నికల ఫలితాలు ప్రకటించిన వెంటనే ధృవీకరణ పత్రం అందజేయడం ద్వారా ఎలాంటి అనుమానాలు తలెత్తకుండా చూడాలని లక్ష్యంగా పెట్టుకుంది. ఎన్నికల్లో గెలిచిన అభ్యర్థులకు వెంటనే సర్టిఫికేట్ జారీ చేయడం ద్వారా ఎన్నికల ప్రక్రియ పూర్తి అయినట్లు అధికారికంగా నమోదు అవుతుందని ఎన్నికల అధికారులు తెలిపారు.
