చక్రపాణి ‘దాడి’ నాటకం!
రూ.2 కోట్లకు క్వారీ కొనుగోలు.. రూ.1.80 కోట్లు చెల్లించా
మిగిలిన రూ.20 లక్షలు ఇచ్చేందుకు సిద్ధంగా ఉన్నా అప్పగించలేదు
సొసైటీ బిల్లుల డబ్బు డ్రా చేసి మాపై ఆరోపణలు
ఆరోపణలన్నీ అవాస్తవం.. పోలీసులకు ఫిర్యాదు చేశాం
టేకులగూడెం ఇసుక సబ్కాంట్రాక్టర్ విక్రమ్రెడ్డి ఆరోపణలు
కాకతీయ, తెలంగాణ బ్యూరో : బీఆర్‌ఎస్‌ నేత, ఆత్మ కమిటీ మాజీ చైర్మన్‌ చంద చక్రపాణి తనపై దాడి జరిగిందంటూ చేస్తున్న ఆరోపణలు పూర్తిగా అవాస్తవమని, తన కారును తానే ధ్వంసం చేసుకుని తమపై నిందలు వేస్తున్నారని టేకులగూడెం ఇసుక సబ్కాంట్రాక్టర్ విక్రమ్రెడ్డి ఆరోపించారు. టేకులగూడెం ఇసుక క్వారీని చక్రపాణి నుంచి రూ.2 కోట్లకు కొనుగోలు చేశామని, ఇప్పటికే రూ.1.80 కోట్లు చెల్లించామని తెలిపారు. ఇంకా చెల్లించాల్సిన రూ.20 లక్షలు ఇచ్చేందుకు సిద్ధంగా ఉన్నప్పటికీ క్వారీని తమకు అప్పగించకుండా ఇబ్బందులకు గురిచేస్తున్నారని అన్నారు. శుక్ర‌వారం ములుగులో విక్రమ్రెడ్డి విలేక‌రుల‌తో మాట్లాడారు. ఈ వ్యవహారానికి రాజకీయ రంగు పులిమి కాంగ్రెస్‌ నాయకుల పేర్లను తెరపైకి తెస్తున్నారని మండిపడ్డారు. చక్రపాణి కారుపై దాడి జరిగిందన్న వార్తలను మీడియా ద్వారా తెలుసుకున్నానని విక్రమ్రెడ్డి తెలిపారు. తాను కరీంనగర్‌లో ఉండగా విషయం తెలియడంతో అసలు వాస్తవాలను వెల్లడించేందుకు విలేకరుల ముందుకు వచ్చినట్లు చెప్పారు. దాడి ఘటనతో తమకు ఎలాంటి సంబంధం లేదని స్పష్టం చేశారు.
రూ.2 కోట్లకు క్వారీ.. రూ.1.80 కోట్లు చెల్లింపు
టేకులగూడెం ఇసుక క్వారీని చక్రపాణి నుంచి రూ.2 కోట్లకు కొనుగోలు చేసినట్లు విక్రమ్రెడ్డి తెలిపారు. ఇప్పటికే రూ.1.80 కోట్లు చెల్లించామని, మిగిలిన రూ.20 లక్షలు చెల్లించేందుకు సిద్ధంగా ఉన్నామని చెప్పారు. అయినప్పటికీ క్వారీని తమకు పూర్తిగా అప్పగించకుండా చక్రపాణి ఇబ్బందులకు గురిచేస్తున్నారని ఆరోపించారు. సొసైటీకి సంబంధించిన చెక్‌బుక్‌ విషయంలోనూ చక్రపాణి వ్యవహరించిన తీరుపై ఆయన తీవ్ర ఆరోపణలు చేశారు. సొసైటీకి తెలియకుండా చెక్‌బుక్‌ను తీసుకెళ్లి అధ్యక్షుడు, సభ్యుల నుంచి ఖాళీ చెక్కులపై సంతకాలు తీసుకున్నారని ఆరోపించారు. ఈ విషయమై గ్రామంలో పలుమార్లు పంచాయితీలు జరిగినా సమస్య పరిష్కారం కాలేదన్నారు. సొసైటీకి బిల్లులు వచ్చిన తర్వాత సభ్యుల సమక్షంలో వాటిని పంపిణీ చేయాల్సి ఉండగా చెక్‌బుక్‌ వ్యవహారం కారణంగా పీవో అధికారులు చెక్కులను రద్దు చేసినట్లు విక్రమ్రెడ్డి తెలిపారు. చెక్కులపై రెడ్‌ పెన్‌తో కొట్టి చెక్‌బుక్‌ను క్యాన్సిల్‌ చేశారని చెప్పారు. తమకు రావాల్సిన బిల్లుల మొత్తాన్ని కూడా చక్రపాణి తమకు తెలియకుండా డ్రా చేసుకున్నారని ఆరోపించారు. తమకు రావాల్సిన డబ్బులు చెల్లించకుండా, క్వారీని అప్పగించకుండా ఇబ్బందులు పెడుతూ ఇప్పుడు దాడి జరిగిందంటూ ఆరోపణలు చేస్తున్నారని విమర్శించారు. తమ మధ్య ఉన్న ఆర్థిక లావాదేవీలను రాజకీయ వివాదంగా మార్చే ప్రయత్నం జరుగుతోందన్నారు.
కాంగ్రెస్‌ నేతల పేర్లతో రాజకీయ రంగు
తనపై దాడి ఘటనలో కాంగ్రెస్‌ నాయకుల పేర్లను చక్రపాణి ప్రస్తావించడం పూర్తిగా రాజకీయ ప్రచారంలో భాగమేనని విక్రమ్రెడ్డి అన్నారు. పైడాకుల శివకుమార్‌, లచ్చు పటేల్‌ తదితరులకు ఈ వ్యవహారంతో ఎలాంటి సంబంధం లేదని స్పష్టం చేశారు. చక్రపాణి ఆరోపణల్లో వాస్తవం లేదన్నారు. బీఆర్‌ఎస్‌ నాయకుడు వై.సతీష్‌రెడ్డి తమను ఫోన్‌లో బెదిరిస్తూ ఒత్తిడి తీసుకొచ్చారని కూడా విక్రమ్రెడ్డి ఆరోపించారు. తమపై రాజకీయ ఒత్తిడి తీసుకొచ్చేందుకు ప్రయత్నిస్తున్నారని అన్నారు. చక్రపాణి తన కారును తానే ధ్వంసం చేసుకుని తమపై దాడి ఆరోపణలు చేస్తున్నారని ఆరోపించారు. ఈ వ్యవహారంలో తమ ప్రమేయం లేదని స్పష్టం చేస్తూ ఎస్పీ కార్యాలయానికి వచ్చి తాము కూడా ఫిర్యాదు చేసినట్లు విక్రమ్రెడ్డి తెలిపారు. చెక్‌బుక్‌ వ్యవహారం, తమకు రావాల్సిన బిల్లుల డబ్బులపై పోలీసులకు వివరాలు అందించామని చెప్పారు. తమకు రావాల్సిన డబ్బులు చెల్లించి, క్వారీని అప్పగించాలని కోరుతున్నామని తెలిపారు. దాడి ఘటనతో తమకు ఎలాంటి సంబంధం లేదని, చక్రపాణి చేస్తున్న ఆరోపణలన్నీ అవాస్తవమని విక్రమ్రెడ్డి తేల్చిచెప్పారు.
