గంజాయిలో గాడి తప్పుతున్న యువత
చేర్యాల పట్టణం సమీప మండలాల్లో మత్తులో బైక్ రేసులు
ప్రమాదాలకు ఆహ్వానం పలుకుతున్న యువత
మత్తు మాయలో పడొద్దు.. చదువే భవిష్యత్తు
: ఎస్ఐ జీ.అపూర్వ రెడ్డి
కాకతీయ, చేర్యాల : చేర్యాల, కొమురవెల్లి, మద్దూర్, దూల్మిట్ట మండలాలలో గంజాయి విక్రయలు రోజు రోజుకు చెలరేగిపోతోంది. దింతో యువత గంజాయి బాట పడుతున్నారు.గంజాయి మత్తు యువత భవిష్యత్తుపై తీవ్ర ప్రభావం చూపుతోంది. తప్పుడు స్నేహాలు, క్షణిక ఆనందం కోసం కొందరు యువకులు గంజాయి బారిన పడుతూ చదువు, ఉద్యోగం, కుటుంబ జీవితాన్ని నిర్లక్ష్యం చేస్తున్నారని ఆందోళన వ్యక్తమవుతోంది.గంజాయి వినియోగం వల్ల జ్ఞాపకశక్తి తగ్గడం, ఏకాగ్రత లోపించడం, మానసిక ఆరోగ్య సమస్యలు వచ్చే ప్రమాదం ఉందని వైద్య నిపుణులు హెచ్చరిస్తున్నారు. విద్యాసంస్థలు, తల్లిదండ్రులు, పోలీసులు సమన్వయంతో అవగాహన కల్పించి యువతను మత్తు పదార్థాలకు దూరంగా ఉంచాల్సిన అవసరం ఉందని సూచిస్తున్నారు.గంజాయి అక్రమ రవాణా, విక్రయాలపై కఠిన చర్యలు తీసుకోవడంతో పాటు యువతకు క్రీడలు, ఉపాధి, నైపుణ్యాభివృద్ధి వంటి సానుకూల అవకాశాలు కల్పించడం ద్వారానే ఈ సమస్యను సమర్థవంతంగా ఎదుర్కోవచ్చని నిపుణులు అభిప్రాయపడుతున్నారు.
మత్తులో బైక్ రేసులు..
ఇటీవలి కాలంలో కొందరు యువకులు గంజాయి వంటి మత్తు పదార్థాల ప్రభావంలో బైక్ రేసులకు పాల్పడుతున్నారనే ఆందోళనలు వ్యక్తమవుతున్నాయి. అధిక వేగంతో నిర్లక్ష్యంగా వాహనాలు నడపడం వల్ల రోడ్డు ప్రమాదాలు జరిగే ప్రమాదం పెరుగుతోంది. దీంతో రేసులో పాల్గొనే వారితో పాటు అమాయక ప్రయాణికుల ప్రాణాలు కూడా ప్రమాదంలో పడుతున్నాయి.
మత్తు మాయలో పడొద్దు.. చదువే భవిష్యత్తు
– జీ. అపూర్వ రెడ్డి, చేర్యాల,ఎస్ఐ
గంజాయి వంటి మత్తు పదార్థాలు యువత జీవితాలను తప్పుదోవ పట్టిస్తున్నాయి. క్షణిక ఆనందం కోసం గంజాయికి అలవాటు పడితే చదువు, ఆరోగ్యం, కుటుంబ జీవితం, భవిష్యత్తు అన్నీ ప్రమాదంలో పడతాయి. గంజాయి మత్తులో వాహనాలు నడపడం వల్ల రోడ్డు ప్రమాదాలు పెరిగే అవకాశం ఉంది. విద్యార్థులు, యువత చెడు స్నేహాలకు దూరంగా ఉండి చదువుపై దృష్టి పెట్టాలి. తల్లిదండ్రులు కూడా తమ పిల్లల ప్రవర్తనను ఎప్పటికప్పుడు గమనించి వారికి సరైన మార్గనిర్దేశం చేయాలి. గంజాయి విక్రయాలు, రవాణా, వినియోగంపై పోలీసు శాఖ ప్రత్యేక నిఘా పెట్టి కఠిన చర్యలు తీసుకుంటోంది. ఎవరైనా గంజాయి విక్రయిస్తున్నా లేదా వినియోగిస్తున్నట్లు తెలిసిన వెంటనే ఫోన్ :87126 67356 నెంబర్ కు సమాచారం అందించాలి. ప్రజలు సహకరిస్తేనే మత్తు పదార్థాల నిర్మూలన సాధ్యమవుతుంది.
