కేశవపట్నంలో పారిశుధ్యం పడకేసింది!
మురుగు కాలువల్లో పేరుకుపోయిన చెత్త..
దోమల విజృంభణతో ప్రజలకు విషజ్వరాల ముప్పు
పట్టించుకోని అధికారులు..
రోగాల బారిన పడితేనే స్పందిస్తారా?
కాకతీయ,శంకరపట్నం:శంకరపట్నం మండలంలోని కేశవపట్నం గ్రామంలో పారిశుధ్య నిర్వహణ అస్తవ్యస్తంగా మారిందని స్థానికులు ఆవేదన వ్యక్తం చేస్తున్నారు. గ్రామంలోని పలు వార్డుల్లో మురుగు కాలువలు శుభ్రం చేయకపోవడంతో చెత్తాచెదారం పేరుకుపోయి దుర్వాసన వెదజల్లుతోంది. మురుగునీరు నిలిచిపోవడంతో దోమలు విపరీతంగా వృద్ధి చెందుతున్నాయని, దీంతో ప్రజలు అనారోగ్య సమస్యలతో ఆందోళన చెందుతున్నారని స్థానికులు వాపోతున్నారు.
మురుగు కాలువలే దోమలకు ఆవాసాలు!
గ్రామంలోని పలు వీధుల్లో పారిశుధ్య పనులు సక్రమంగా నిర్వహించకపోవడంతో మురుగు కాలువలు అధ్వానంగా మారుతున్నాయనే విమర్శలు వినిపిస్తున్నాయి. కాలువల్లో పూడిక తీయకపోవడం, చెత్తను తొలగించకపోవడం వల్ల దోమల బెడద రోజురోజుకూ పెరుగుతోందని ప్రజలు అంటున్నారు. ఇప్పటికే విషజ్వరాల భయం వెంటాడుతుండగా, దోమల నివారణకు అవసరమైన చర్యలు చేపట్టడంలో అధికారులు నిర్లక్ష్యం వహిస్తున్నారనే ఆరోపణలు వ్యక్తమవుతున్నాయి.
ప్రజల ఆరోగ్యంపై అధికారులకు పట్టింపు లేదా?
పారిశుధ్యం సక్రమంగా లేకపోవడం వల్ల ప్రజలు తీవ్ర ఇబ్బందులు ఎదుర్కొంటున్నా సంబంధిత అధికారులు పట్టించుకోవడం లేదని స్థానికులు ఆగ్రహం వ్యక్తం చేస్తున్నారు. వ్యాధులు ప్రబలిన తర్వాత హడావుడి చేయడం కంటే ముందుగానే నివారణ చర్యలు చేపట్టాల్సిన బాధ్యత అధికారులపై ఉందని పేర్కొంటున్నారు. గ్రామంలో పారిశుధ్య పరిస్థితులు ఇలాగే కొనసాగితే ప్రజారోగ్యంపై తీవ్ర ప్రభావం పడే ప్రమాదం ఉందని ఆందోళన వ్యక్తం చేస్తున్నారు.
ఇప్పటికైనా స్పందించాలి!
సంబంధిత గ్రామపంచాయతీ అధికారులు తక్షణమే స్పందించి అన్ని వార్డుల్లో మురుగు కాలువలను శుభ్రం చేయాలని, పేరుకుపోయిన చెత్తను తొలగించాలని, దోమల నివారణకు ఫాగింగ్‌తో పాటు తగిన చర్యలు చేపట్టాలని గ్రామస్తులు డిమాండ్ చేస్తున్నారు. ప్రజలకు పరిశుభ్రమైన వాతావరణం కల్పించడంలో అధికారులు ఇకనైనా నిర్లక్ష్యాన్ని వీడి యుద్ధప్రాతిపదికన చర్యలు చేపట్టాలని కోరుతున్నారు.
