పట్టభద్రుల ఓటరు నమోదును వేగవంతం చేయాలి

పట్టభద్రుల ఓటరు నమోదును వేగవంతం చేయాలి
నవంబర్‌ 6లోగా ప్రతి పట్టభద్రుడి ఓటు నమోదు కావాలి
డీసీసీ కార్యాలయంలో ప్రత్యేక సహాయక కేంద్రం
వర్ధన్నపేటలో రికార్డు స్థాయిలో నమోదు లక్ష్యం
కాంగ్రెస్‌ అభ్యర్థి రాంరెడ్డి సర్వోత్తమ్‌రెడ్డి విజయానికి కృషి చేయాలి
హనుమకొండ డీసీసీ అధ్యక్షుడు ఇనగాల వెంకట్రామ్‌రెడ్డి

కాకతీయ, హనుమకొండ: వరంగల్‌–ఖమ్మం–నల్గొండ పట్టభద్రుల ఎమ్మెల్సీ ఎన్నికల్లో కాంగ్రెస్‌ అధికారిక అభ్యర్థి రాంరెడ్డి సర్వోత్తమ్‌రెడ్డిని భారీ మెజారిటీతో గెలిపించడమే లక్ష్యంగా పార్టీ శ్రేణులు పనిచేయాలని హనుమకొండ డీసీసీ అధ్యక్షుడు ఇనగాల వెంకట్రామ్‌రెడ్డి పిలుపునిచ్చారు. నవంబర్‌ 6లోగా అర్హులైన ప్రతి పట్టభద్రుడి ఓటు నమోదు చేయించాలని, ఈ ప్రక్రియను క్షేత్రస్థాయిలో వేగవంతం చేయాలని సూచించారు. ఆదివారం నిర్వహించిన వరంగల్‌–ఖమ్మం–నల్గొండ పట్టభద్రుల ఎమ్మెల్సీ ఎన్నికల వర్ధన్నపేట నియోజకవర్గ సమావేశంలో ఇనగాల వెంకట్రామ్‌రెడ్డి మాట్లాడారు. పట్టభద్రుల ఓటరు నమోదును సులభతరం చేసేందుకు హనుమకొండ డీసీసీ కార్యాలయంలో ప్రత్యేక సహాయక కేంద్రాన్ని ఏర్పాటు చేసినట్లు తెలిపారు. జిల్లాలోని పట్టభద్రులు, కాంగ్రెస్‌ కార్యకర్తలు ఈ అవకాశాన్ని సద్వినియోగం చేసుకోవాలని కోరారు.

48 శాతమే ఓటరు నమోదు

ముఖ్యమంత్రి రేవంత్‌రెడ్డి నిర్వహించిన సమీక్షలో వెల్లడైన వివరాల ప్రకారం వరంగల్‌–ఖమ్మం–నల్గొండ నియోజకవర్గంలో పట్టభద్రుల ఓటరు నమోదు 48 శాతంగానే ఉందని ఇనగాల తెలిపారు. నమోదు ప్రక్రియ సెప్టెంబర్‌ 28న ప్రారంభమైందని, ఆన్‌లైన్‌లో దరఖాస్తు చేసుకోవడానికి నవంబర్‌ 6 వరకు మాత్రమే గడువు ఉందని చెప్పారు. గతంలో ఓటు హక్కు ఉన్నవారు సైతం ఈసారి ఫారం–18 ద్వారా కొత్తగా నమోదు చేసుకోవాలని స్పష్టం చేశారు. వర్ధన్నపేట నియోజకవర్గంలోని గ్రామాలు, మున్సిపాలిటీలు, డివిజన్లు, వార్డుల వారీగా పట్టభద్రులను గుర్తించి ఓటరు నమోదును వేగవంతం చేయాలని వెంకట్రామ్‌రెడ్డి సూచించారు. మండల, డివిజన్‌ అధ్యక్షులు, నాయకులు, కార్యకర్తలు సమన్వయంతో పనిచేసి అర్హులైన ప్రతి ఒక్కరి ఓటు నమోదు చేయించే బాధ్యత తీసుకోవాలని కోరారు. గత ఎన్నికల కంటే ఈసారి వర్ధన్నపేటలో రికార్డు స్థాయిలో ఓటరు నమోదు జరిగేలా కృషి చేయాలని పిలుపునిచ్చారు. ఈ సమావేశంలో ముఖ్య అతిథులుగా వరంగల్‌ పార్లమెంట్‌ ఇన్‌చార్జి, ఎమ్మెల్సీ శంకర్‌నాయక్‌, ఎమ్మెల్సీ బస్వరాజు సారయ్య, వరంగల్‌ డీసీసీ అధ్యక్షుడు ఎండీ అయ్యూబ్‌, టీపీసీసీ మహిళా అధ్యక్షురాలు ఎర్రబెల్లి స్వర్ణ, మాజీ టెస్కాబ్‌ చైర్మన్‌ మార్నేని రవీందర్‌రావు పాల్గొన్నారు. మల్లారెడ్డిపల్లి పీఏసీఎస్‌ చైర్మన్‌ బయగోని కుమారస్వామి, హనుమకొండ జిల్లా యువజన కాంగ్రెస్‌ అధ్యక్షుడు కె.ఆర్‌.దిలీప్‌రాజ్‌, జవహర్‌ బాల్‌ మంచ్‌ వరంగల్‌ జిల్లా చైర్మన్‌ జన్నపురెడ్డి రుగ్వేద్‌రెడ్డి, మాజీ కార్పొరేటర్లు, డివిజన్‌, మండల అధ్యక్షులు, ఇతర ముఖ్య నాయకులు హాజరయ్యారు.